Hatutan.com, (08 Maiu 2026), Díli– Vise-Prezidente Krus Vermella Timor-Leste (CVTL), Marcal Freitas Magno hateten, dezafiu neʼebé CVTL infrenta mak menus hetan doasaun ran husi komunidade tanba komunidade tauk atu oferese ran.

Vise-Prezidente CVTL, Marcal Freitas Magno ho Xefe Departamentu Banku Shangue HNGV, Alexandrino, Mendonça .

Vise-Prezidente Cruz Vermelha Timor-Leste (CVTL), Marcal Freitas Magno afirma, CVTL durante ne’e halo kooperasaun ho banku shangue HNGV, no banku shange halo mós sosializasaun kona-bá oinsá buka ran hodi garante ba pasiente sira ne’ebé presiza ran.

Iha Timor, tuir nia, presiza ran barak maibé ema fó ran menus, tanba dalaruma familia ne’ebé mak iha ospitál moras emerjénsia presiza ran sempre kontaktu mai CVTL, banku shange presiza ran, maibé família atu fó ran tauk.

“Balu dehan ha’u fó ran ne’e orsida bokur liu, balu tauk krekas liu, maibé lae CVTL ho banku change nia objetivu mak ita fó ran turuk ida ba ema ida salva ona ema nian vida, “dehan Vise- Prezidente CVTL Marcal Freitas Magno ba jornalista sira iha edifisiu CVTL hafoin selebra aniversariu loron CVTL nian, Sesta (08/05/2026).

Nia afirma daudaun ne’e CVTL iha voluntariu hamutuk 7000 pesoál iha teritóriu tomak, iha filial hotu-hotu, no durante ne’e CVTL servisu hamutuk ho banku shangue HNGV, Ministériu Saúde, Polisia Nasionál Timor-Leste nomós Forsa Armada Timor-Leste hodi halo doasaun ran.

“Oinsá para bele buka ran, maibé ema fó ran ne’e tauk, entaun liuhosi kooperasaun sira ne’e oinsá ami servisu hamutuk halo sosializasaun nafatin ba komunidade sira atu sira labele tauk fó ran, tanba agora daudaun asidente barak,” nia dehan.

Nia afirma durante ne’e voluntáriu sira neʼebé oferese sira nian ran barak mai husi pesoál PNTL no F-FDTL. CVTL husu komunidade hotu iha Timor laran tomak labele tauk mai fó ran hodi bele salva ema ida nian vida liuhosi ran tutur ida

Iha fatin hanesan Xefe Departamentu Banku Shangue HNGV, Alexandrino, Mendonça hateten, estoke ran ne’ebé daudaun ne’e banku change iha mak 81 ran hodi koserva iha ne’ebá hodi halo atendimentu ba pasiénte sira ne’ebé presiza ran

Nia afirma banku change mós kada loron sempre hatama doasaun ran husi voluntáriu sira. kada loron banku shangue oferese ran 40 ba leten hodi atende pasiénte sira iha HNGV ne’ebé presiza ran.

“Ha’u hakarak hato’o ba komunidade sira nia tulun voluntáriu sira mai halo doasaun ran nafatin hodi bele salva ema nia vida,” dehan xefe departamentu banku change HNGV ne’e.

Jornalista: Zita Menezes