Hatutan.com, (16 Jullu 2026) Díli-Porta-vós Polísia Nasionál Timor-Leste (PNTL) Superintendente-Xefe Polísia, João Belo dos Reis, informa, Kinta ohin, (16/07/2026), sei submete suspeitu na’in-90  ba julgamentu interogasaun dahuluk iha Tribunál Judisiál Primeira Instánsia Díli (TJPID).

Lee Mós: PNTL Dezmantela Tan Atividade Scam Call Centre iha Comoro ho Ulmera, Detein Xinés ho Indonéziu Na’in-90

Polísia desmantela no detein suspeitu sira kazu scam call centre iha Ulmera, foin lalais ne’e. Foto/Juvinal Cabral dos Santos

Suspeitu sira ne’ebé maioria saidadaun Xina ne’e, autoridade Timor-Leste kaptura tanba envolve iha atividade ilísitu scam call centre iha fatin rua; Kampu Baru-Comoro ho Ulmera-Liquiça.

“Ami aprezenta tan kazu Ulmera nian ho kazu Kampung Baru-Comoro nian ba MP no husi kazu Kampung Baru nian evidénsia sira ami rekolla mak ne’e laptop 12, telefone 18, aparelu starlink, komputador boot no selu-seluk tan hamutuk 14, no karreta motór balun mós ami prende,”  Superintendente-Xefe Polísia João Belo dos Reis, ba jornalista iha Komandu Jerál PNTL, Kuarta (15/07/2026).

 Iha parte Ulmera nian, Polísia prende komputador boot unidade 40, laptop-70, simcard telkomsel life foun seidauk uja husi Indonézia 70,  aparelu starlink lima, totál telefone iha Ulmera 168 no  sasán sira ne’e lori mai hotu iha DSIK hanesan evidensia ba asaun sira ne’ebé mak sira halo.

Nia hatutan, kazu Scam Call Centre parte Ulmera registu ona ho númeru NUK: 0248/2026-PNSIK no ida iha Kampung Baru Comoro nian registu ho NUK: 0247/2026-PNSIK.

PNTL husu nafatin ba lideransa komunitariu sira karik ema ruma tama bairo ka suku aluga uma iha ne’ebá  mak suspeita iha relasaun redi Kriminál internasionál favor komunika ba autoridade seguransa halo intervensaun.

Jornalista: Juvinal Cabral dos Santos