Hatutan.com, (26 Outubru 2022), Díli- Vise Prezidente Asosiasaun Kafé Timor (ACT, sigla portugés), Afonso de Oliveira, hateten kafé Timor hola parte iha istória Timor-oan nian no sai identidade kulturál ne’ebé reprezenta Timor-Leste iha mundu.

Lee Mós : Kafé Ermera Reprezenta Mós Timor-Leste iha Mundu Internasionál

Festival Kafé Timor, Kuarta (26/10/2022). Foto/Elio dos Santos da Costa

Liuhosi Festival Kafé Timor ne’ebé hala’o iha Resintu Palásiu Prezidensiál, Kuarta loro-kraik (26/10/2022),  Afonso de Oliveira hateten bainhira ko’alia kona-ba kafé, la ko’alia de’it ba kafé hanesan simples bá konsumu de’it, maibé ko’alia kafé ko’alia mós Timor-oan nia istória, identidade, kultura ida.

ACT haksolok no onradu prezensa Xefe Estadu ne’ebé aseita konvite husi Komisaun Organizadór no hakat mai partisipa eventu festival kafé Timor Leste.

Eventu ida  dala-VII ne’e nu’udár ba dahuluk órgaun soberania importante sira hanesan Prezidensia Repúblika no Gabinete Primeiru Ministru toma parte no organiza eventu ida ne’e desde inisiu to’o agora.

ACT fó parabens no agradesimentu, pela primeiravez ne’ebé orgaun soberania importante ne’e fó importánsia tebetebes bá kafé, ne’e motivasaun ida bele funsióna ACT atu hala’o servisu di’ak ba setór kafé.

“Seitór kafé ne’e importante tebe-tebes tanba ita-nia populasaun 25% depende bá kafé, maibé ohin loron  ita-nia produsaun kafé komesa monu tinan bá tinan. Ami mós haksolok ho VIII Governu konstitusionál ne’ebé foin daudauk iha orsamentu retifikativu aloka orsamentu ida bá reabilitasaun kafé,” Afonso de Oliveira hateten.

ACT hanesan organizasaun ne’ebé tau matan bá kafé, asina tiha ona akordu ida ho Ministériu Agrikultura no Peskas (MAP), sai nu’udár implementadór bá programa reabilitasaun kafé.

“Kafé mós sai hanesan valor paisajestiku no sei kontribui mitigasaun bá alterasaun ka mudansa klimátika, tanba sei kontribui bá haburas ita-nia ambiente ho partikular ita-nia rain, bee moris iha rai okos, habokur mós mahon sira ne’ebé halo mahon bá kafé,” nia dehan.

ACT husi ninia estabelesimentu iha tinan 2016 to’o ohin loron hala’o ona atividade lubuk ida no ida ne’ebé rezultadu prátiku mak ohin loron kafé kualidade komesa sa’e.

ACT haksolok ho apoiu sira ne’ebé mai hosi doadór bara-barak hosi Austrália, Nova Zelándia,  Portugál ho Repúblika Xina.

Iha oportunidade lansamentu Festival Kafé Timor ne’e,  Prezidente Repúblika (PR), José Ramos-Horta nafatin halo apelu bá sidadaun sira atu kontinua kuidadu kafé.

Nia afirma, eventu ida ne’e halo promove kafé atu aumenta liután produsaun tinan sira mai ne’e tanba ema barabarak iha Asia, Europa, Amérika ne’eba sira hakarak sosa kafé Timor.

“Ita nia kafé nia kuantidade seidauk sufsiente, ne’ebé tenke aumenta liután, tenke tau matan, tenke hadomi kafé labele husik duut boot mak oho tiha kafé, tenke hadomi kafé hanesan hadomi animal sira seluk iha uma, hadomi kafé hanesan hadomi ai-funan sira, hadomi kafé hanesan povu Japaun hadomi sira nia foos,” José Ramos-Horta hateten.

Xefe Estadu sublina hanesan iha Franca, Itália sira hadomi paun no Timor tenke hakuak kafé tanba bele fó osan boot ba Timor.

Jornalista: Vito Salvadór