Hatutan.com (15 Outubru 2021), Dili—Polísia Nasionál Timor-Leste (PNTL), Munisípiu Baukau, suspeita hela ema na’in-tolu ne’ebé deskonfia oho vítima ka matebian Celestino Ximenes ‘Lemorai’ hanesan mós Veteranu iha Suku Namanei, Postu Administrativu Kelikai, Munisipiu Baukau.

Mate-isin Celestino Ximenes ‘Lemorai’. Foto/Facebook.

Komandante PNTL Munisípiu Baucau, Superintendente Xefe, Armando Monteiro, ba Hatutan.com esplika, akontesiementu ne’e iha Kinta 14 Outubru kalan, iha tuku 20:30 otl.

Superintendente Xefe, Armando Monteiro konta-tuir, problema ne’e, mosu la’ós tanba ema seluk ka ema leet mak oho-malu maibé mesak família uma-laran de’it.

“Feton ho na’an no rian mak oho-malu ne’e. Vítima ho suspeitu ne’e mesak rian ho mane foun. Problema ida-ne’e, tuir vítima nia deklarasaun katak, bainhira suspeitu sira ne’ebé foin kaptura daudaun ne’e ba halo hela serbisu, vítima ho nia kaben ba ameasa suspeitu ninia inan-aman ne’ebé hanesan matebian ne’e ninia banin rasik. Hosi ameasa-malu ne’e maka ikus mai mosu oho-malu,” Armando Monteiro, hateten ba Hatutan.com via telefónika, Sesta (15/10/21).

Komandante ne’e mak agora daudaun lidera diretamente prosesu investigasaun ba kazu ida-ne’e, no iha minutu 30 liu bá, Polísia konsege kaptura tán suspeitu na’in-rua ne’ebé oras-ne’e iha ona Komandu munisípiu Baukau.

Suspeitu na’in-tolu ne’ebé PNTL detein ona iha Komandu Munisípiu Baukau. Foto/Facebook.

Horikalan, hafoin akontesimentu Polísia kaptura uluk na’in-ida, iha tuku 03:15 madrugada kaptura ida, no foin kaptura tán ida iha tuku 07:12 dadeer, ne’ebé mesak maun-alin de’it.

“Oras-ne’e daudaun ha’u mós orienta hela ita-nia ekipa ba hela iha terrenu atu rekolla tán evidénsia atu kompleta prosesu ne’e. Ami kontinua halo investigasaun,  bainhira remata mak ami sei kompleta liu tán informasaun,” nia hateten.

Nune’e mós Komandante Jerál PNTL, Komisáriu Faustino da Costa, simu ona informasaun kona-bá kazu ne’e hosi komandu Munisípiu Baukau katak, oras-ne’e daudaun detein ona suspeitu sira, no sei kontinua iha prosesu investigasaun.

“Ha’u hakarak informa katak, ita-nia polísia iha Baukau rekolla ona evidénsia kona-bá kazu ne’e no problema ne’e mosu tanba problema família. Depois ita nia Portavós Komandu Jerál mak sei fó-sai informasaun detalla,” Komisáriu Faustino da Costa, hateten ba Jornalista-sira iha edifísiu Provedoria Direitus Humanus (PDHJ), Kaikoli, Dili.

Oras-ne’e daudaun mate-isin ‘Lemorai’ transporta ona mai Hospitál Nasionál Guido Valadares (HNGV) atu bele submete ba prosesu autópsia.

Jornalista: Rogério/Carmen