Hatutan.com, (27 Janeiru 2023), Díli—Federasaun Futeból Timor-Leste (FFTL) hamutuk ho Órgaun Liga Futeból Timor-Leste (LFTL) no Sekretáriu Estadu Juventude no Desportu (SEJD) realiza enkontru triparti hodi halo konfirmasaun kona-bá realizasaun Liga Timorense époka 2022-2023.

Enkontru entre Federasaun Futebol Timor-Leste (FFTL) ho Órgaun Liga Futeból Timor-Leste (LFTL) no Sekretáriu Estadu Juventude no Desportu (SEJD), Sesta (27/01/2023).

Tuir planu, Liga Timorense époka 2022-2023 sei realiza iha Fevereiru no kalendáriu ba jogu sira primeira divizaun sei realiza iha 17 Fevereiru, enkuantu realizasaun ba jogu segunda divizaun sei hahú kick off iha 24 fevereiru 2023.

Lee Mós: LFTL ho Klube Primeira-Segunda Divizaun Konkorda Realiza Liga Timorense Époka 2022-2023

Adjuntu Sekretáriu Jerál FFTL, Frederico Martins hateten, enkontru triparti ne’ebé SEJD, FFTL no LFTL hala’o ne’e ho objetivu atu halo konfirmasaun ka relatóriu finál kona-bá realizasaun liga Timorense époka 2022-2023.

Klubu sira ne’ebé sei kompete iha primeira no segunda divizaun Liga Timorense kuaze halo ona rejistrasaun no sira prontu ona atu kompete iha Liga tinan ne’e.

“Ami hala’o enkontru finál ba realizasaun Liga Timorense époka 2022-2023.  Kona-bá prosesu administrasaun no finansas nia rezolve ona no sei halo transferênsia ba iha órgaun Liga atu bele organiza,” Frederico Martins hateten iha sede SEJD, Lecidere, Sesta (27/01/2023).

Segundu Vise-Prezidente LFTL, Octávio da Conceição hateten klubu sira hotu-hotu halo ona rejistrasaun iha LFTL no maioria klubu sira mós halo ona transferênsia ba Jogadór tantu nasionál no mós internasionál.

“Órgaun Liga prontu ona atu organiza liga no klubu sira maioria hatudu sira nia prontidaun atu compete,” Octávio da Conceição hateten.

Klubu sira ne’ebé sei kompete iha primeira divizaun mak hanesan Karketu Díli Fc, Assalam Fc, Ponta Leste Fc, Coração Fc, Emanuel Fc, Aitana Fc, Academika Fc, no AD SLB Laulara Fc.

Enkuantu klubu sira segunda divizaun mak hanesan DIT Fc, Fitun Estudante Fc, Kablaki Fc, Nagarjo Fc, Zebra Fc, As Marca Fc, Santa Cruz Fc, Lica-Lica Lemorai FC no Portu Taibessi Fc.

Totál jogu bá klubu primeira divizaun no segunda divizaun hamutuk 64 jogus ho durasaun tempu fulan tolu.

Jornalista: Vito Salvadór