Hatutan.com, (03 Maiu 2023), Díli- Sekretáriu Estadu Juventude no Desportu (SEJD), Abrão Saldanha rekoñese katak atleta Timor-Leste ne’ebé partisipa iha Sea Games bá dala-XXXII iha Kambodia kada loron simu osan bá bolsu nian (uang saku) $46.00 tuir rekizitu internasionál ne’ebé Timor-Leste adopta.

Lee Mós : Partisipasaun TL Iha Sea Games Ho $147.000, Loron Ida Kada Atleta Simu $46

Sekretáriu Estadu Juventude no Desportu (SEJD), Abrão Saldanha. Foto/Elio dos Santos da Costa

Governu Timor-Leste aloka orsamentu $147.000 hodi finansia partisipasaun kontinjente Timor-Leste (TL) iha Sea Games 2023 iha Kambódia. Orsamentu ne’e hodi finansia delegasaun kontinjente Timor-Leste nian hamutuk na’in-103, kompostu hosi ekipa mai hosi CONTL ho atleta no ofisiál na’in 90 mai hosi Federasaun desportiva Taekwondo, Volly Praia, Karatedo, Atletizmu, Boxing, Siklizmu, Soft Tenis, E-sport, Futeból no mós modalidade seluk ne’ebé federasaun internasionál sira mak finansia direta atleta no ofisiál sira nia dezlokasaun ba Kambodia.

SEJD Abrão Saldanha hateten, saida mak Governu halo hahú hosi preparasaun too atleta sira bá partisipa iha Sea Games Kambodia no hakarak klarifika katak durante preparasaun iha Timor-Leste atleta sira husi kada federasaun no modalidade ne’ebé iha simu osan remunerasaun ka osan bá bolsu (Uang Saku)  $120.00 kada fulan no ida ne’e la inklui ho han, hemu no farda ketak.

Advertisement

Nia afirma agora daudauk sira sai ona ba rai-li’ur SEDJ  aplika Daily Subsiistence Allowance (DAS) ne’ebé Nasaun Unidas iha katak aplikasaun perdiem ka osan bolsu nian tuir ONU nia rate ne’ebé iha.

“Ita aplika DAS signifika Governu kobre ona hahán no akomodasaun tomak durante atleta sira-nia estadia iha Kambodia tamba ne’e loron ida fó osan bolsu nian $46.00,” SEJD Abrão Saldanha ba Jornalista sira liuhosi konferénsia ba imprensa ne’ebé hala’o iha edifísiu SEJD, Kuarta (03/05/2023).

Sekretáriu Estadu ne’e hatutan, bá futebol mós hanesan Jogadór sira hetan $500.00 no federasaun kobre kustu sira bá treinu, akomodasaun no nesesidade seluk ne’ebé Jogadór sira nesesita.

“Tamba ne’e ba públiku sira labele rona katak ida ne’e osan laiha, ita nia osan iha no osan ba partisipasaun iha Sea Games Kambodia sei iha restu tan balun,” Abrão Saldanha subliña.

Governante ne’e husu apoiu públiku Timor-Leste nian bá kontinjente nasionál Timor-Leste nian ne’ebé dezloka bá Kambodia atu reprezenta Timoroan hotu nia orgullu iha festa desportiva rejionál Sea Games bá dala-XXXII iha Kambodia.

Advertisement

Jornalista: Vito Salvadór