Hatutan.com, (02 Fevereiru 2023), Díli- Konselleiru másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar, afirma katak sira-nia parte hakru’uk bá direitu prerrogativa Prezidente Repúblika nian atu  dekreta loron eleisaun parlamentár 2023 nian iha tempu badak ne’e.

Lee Mós : 13 Fevereiru, Prezidente Repúblika Dekreta Loron Eleisaun Parlamentár

Estrutura Partidu KHUNTO halo deklarasuan bá jornalista sira hafoin hasoru malu ho PR José Ramo-Horta iha Pálasiu Prezidensiál, Kinta (02/02/2023). Foto/Elio dos Santos da Costa

José dos Santos Naimori Bucar ho nia partidu KHUNTO, Kinta (02/02/2023), marka prezensa iha Palásiu Prezidensiál hodi hatán bá konvite hosi Xefe Estadu hodi rona opiniaun partidu KHUNTO nian molok Prezidente Repúblika dekreta loron eleisaun parlamentár.

“Bainhira mak Prezidente Repúblika fó sai kalendáriu eleisaun parlamentár no monu iha data saida, ita hotu-hotu hein ne’e mak Xefe Estadu hakarak, no rona polítiku sira nia hanoin tomak atu bele la’o situasaun ne’ebé di’ak ema hotu-hotu bele tuir regras, tuir polítiku ne’ebé di’ak atu eleisaun ne’e di’ak liu tan,” José dos Santos Naimori Bucar haktuir bá jornalista sira.

Partidu KHUNTO nia preparasaun hasoru eleisaun parlamentár másimu ona no sente katak KHUNTO prontu ona bá eleisaun parlamentár ida ne’e ho di’ak.  Maske nune’e, partidu KHUNTO ne’ebé hetan asentu iha Parlamentar ho kadeira lima iha eleisaun Parlamentar 2017 liubá sei sa’e tan bá kadeira neen (6) ka hitu (7).

KHUNTO iha lema ida ne’ebé hateten haluha pasadu haree bá futuru, haluha pasadu la’ós istória luta nian, maibé haluha pasadu ida ne’ebé ema nia ego, problema ki’ik sira no buat hotu ne’ebé hafahe povu.

Koligasaun antes ho partidu balun ka avansa mesak, Konselleiru másimu partidu KHUNTO ne’e hatán katak hotu-hotu halo polítika tanba hotu-hotu iha konteúdu katak partidu ne’e atu manán ka la manán hotu-hotu tenke hato’o nia forsa ida ne’ebé atu hetan fiar hosi povu ne’e, tamba ne’e KHUNTO tenke hatudu momoos, povu mak sei deside, no julga katak nia hakarak ka gosta partidu ida ne’ebé.

“Ita nia Plataforma agora ne’e ho hanoin katak atu asegura VIII Governu Konstitusionál maibé ba eleisaun agora idadiak la’o ninian depois eleisaun hotu mak ita bele ko’alia,” José dos Santos Naimori Bucar  afirma.

Jornalista: Vito Salvadór