Hatutan.com, (05 Fevereiru 2023), Díli—Prezidente Partidu Libertasaun Populár (PLP), Taur Matan Ruak, husu bá kuadru sira hahú hosi nasionál to’o baze tenke servisu makas atu bele sai partidu ne’ebé hetan segundu lugár iha eleisaun Parlamentár 2023.

Prezidente Partidu Libertasaun Populár (PLP), Taur Matan Ruak, partisipa iha konferénsia munisipál Díli nian ba daruak iha Centro Convenção Díli (CCD), Sábadu (04/02/2023).

“Partidu atu manán iha eleisaun Parlamentár tinan ne’e, kuadru sira hosi nasionál to’o baze tenke servisu makas. Tenke serbisu makaas atu partidu ne’e sai segundu mais votadu,” Taur Matan Ruak hateten iha diskursu konferénsia munisipál Díli nian ba daruak iha Centro Convenção Díli  (CCD), Sábadu (04/02/2023).

Lee Mós: PLP Hakarak Eleisaun Ida Ne’ebé Kualidade

Konferénsia daruak PLP nível munisípiu ne’ebé hala’o iha Díli ho objetivu atu hili estrutura munisipál atu bele fó apoiu no dezenvolve partidu tuir misaun no vizaun ne’ebé partidu nian.

Tanba ne’e, Taur Matan Ruak enkoraza no motiva kuadru ho militante tomak atu mantein disiplina no hatudu umildade hodi haforsa ezisténsia PLP nian, tanba partidu ne’e nia prinsípiu maka respeita ema hotu-hotu no labele husik ema ida iha kotuk.

Nia mós fó parabéns ba estrutura munisípiu Díli no ba komisaun organizadora ne’ebé organiza konferénsia munisipál PLP nian, no espera katak ho konferénsia ne’e sei hametin liután partidu iha futuru.

Taur Matan Ruak sita katak, PLP nia prinsípiu maka servisu koletiva no ema ida-idak hala’o nia responsabilidade ho umildade, disiplina tanba ne’e importante atu bele lori partidu ba atinze objetividade ida.

Jornalista: Vito Salvadór