Hatutan.com, (24 Maiu 2023), Díli- Prezidente Partidu Libertasaun Populár (PLP), Taur Matan Ruak, atuál Primeiru-Ministru  VIII Governu Konstitusionál parabeniza povu Timor-Leste tomak, partidu polítiku sira hotu, espesiál partidu CNRT ne’ebé sai vensidor iha eleisaun parlamentár, 21 fulan-Maiu 2023.

Lee Mós : Rezultadu Final STAE: CNRT Hetan Kadeira 31 no FRETILIN Kadeira 19 

• Xanana ho CNRT Seidauk Bele Ko’alia Forma Governu

Prezidente Partidu Libertasaun Populár (PLP), Taur Matan Ruak. Foto/Dok. PLP

“Ha’u hakarak aproveita oportunidade ida-ne’e, patabeniza partidu sira hotu ne’ebé partisipa iha eleisaun no espesiál partidu vensidór CNRT,” Taur Matan Ruak hateten. 

Tuir rezultadu finál provizóriu hosi  hosi STAE hatudu katak iha eleisaun parlamentár ne’e povu fó konfiansa bá partidu CNRT ho votu  288,101  no persentajen 41,62  ka kadeira parlamentár 31.

Taur Matan Ruak, agradese mós bá sidadaun sira nian partisipasaun, kontribuisaun  sira hotu, iha problema ki’ik oan mas kompara ho eleisaun sira seluk kadavés mais neineik  hadi’a, mellora ida-ne’e kredibeliza ka foti Timor-Leste nia prestizu nu’udár nasaun \ne’ebé valoriza sistema demokrátiku no direitu.

Nia agradese mós bá observadór sira, bá PNTL ne’ebé brillante  halo servisu ida ne’ebé fora de normál ne’ebé Primeiru-Ministru elojiu Komandante PNTL, no mós Komandante F-FDTL no  Estadu Timor-Leste nia funsionáriu sira hotu, liu-liu STAE-CNE, fiskais sira, jornalista sira kobertura fó kontribuisaun direitu no indiretamente atu festa demokrasia ne’e bele la’o.

Taur Matan Ruak, hateten prontu simu rezultadu eleisaun parlamentár ne’ebé povu fó bá PLP no sei kontinua apoiu dezenvolvimentu no kombate kiak iha Timor-Leste.

Rezultadu eleisaun parlamentár   final provizóriu hosi  STAE hatudu katak PLP hetan votu 40696 ne’ebé ekivale bá persentajen  5,88 no hetan kadeira haat (4) iha Parlamentu Nasionál.

“Se ita-boot sira lembra, ha’u nia entrevista bainhira ha’u bá vota,  21 fulan-Maiu 2023, ha’u nia liafuan mak ne’e simu buat ne’ebé povu fó, no la’ós buat ne’ebé ita hakarak,” Taur Matan Ruak haktuir bá jornalista sira iha Palásiu Prezidensiál, Díli, Kuarta (24/5/2023).

Taur Matan Ruak afirma, hakarak ne’e buat seluk ida, PLP bele kadeira 8 mantein ka sa’e ba kadeira 20 ka bele mós tun, mais ne’e la’ós buat ne’ebé povu hakarak entaun tenke simu ida ne’ebé povu hakarak.

“Iha boot sira hatene kiak multidemsionál ne’e 40% ka 50% ne’e ita haree setór tolu importante, rendimentu setór ekonómiku, edukasaun, saúde, 47% má-nutrisaun, 36% inseguransa alimentár, 9,6% dezempregu ne’e dezafiu, ita-nia dezafiu sira-ne’e iha Governasaun ida mak la rezolve,” Taur Matan Ruak  tenik.

Taur argumenta  katak iha Portugál ne’ebé ukun an liu ona tinan 80 besik 90 sei ko’alia kiak, Timor-Leste foin tinan 20 no problema kiak sei iha no tenke kombate.

Jornalista: Vito Salvadór