Hatutan.com, (07 Fevereiru 2023), Díli-Polísia Nasionál Timor-Leste (PNTL), Unidade Espesiál Polísia (UEP), liuhosi Corpo Segurança Pessoal (CSP) hamutuk na’in-275, intensifika treinamentu kona-bá defeza pesoál polisiál, hodi asegura alta-entidade sira iha kampaña polítika no eleisaun parlamentár, tinan ne’e.

Lee Mós : Ministru Interiór Orienta Komandu PNTL Asegura Naimori ho CSP Na’in-Tolu

Corpo Segurança Pessoal (CSP) hamutuk na’in-275, intensifika treinamentu kona-bá defeza pesoál polisiál. Foto/Elio dos Santos da Costa

Iha Tersa, 07 fulan-Fevereiru 2023, komandu PNTL liuhosi UEP, abertura serimónia kursu defeza pesoál polisiál bá membru sira, iha kuartél UEP, Bairro Pite, Díli.

Komandante CSP, Inspetór Xefe Marcos Lopes, hateten,  formasaun defeza pesoál polisiál ne’e, sei oferese bá membru CSP sira hotu hamutuk na’in-275. Maibé, kursu ne’e fahe bá grupu hamutuk 10. Primeiru grupu kompostu hosi ema na’in 24, mane 23, feto na’in-1.

Kursu ida ne’e, hala’o bá Sarjentu Xefe, Primeiru Sarjentu, Sarjentu, Ajente Xefe, Ajente Prinsipál, no Ajente, tanba durante ne’e, membru barak mak iha de’it terrenu, sira mak enfrenta dezafiu barak tebes iha terrenu uainhira fó seguransa bá ema importante sira.

“Fó treinu bá sira, tanba iha tempu badak, ita-nia Prezidente Repúblika sei marka kampaña bá eleisaun parlamentár nian. Kursu formasaun defeza pesoál, hanesan fó koñesimentu ierarkia bá membru sira, tantu ajente, ajente xefe, sarjentu sira. Ne’e la haree membru foun ne’ebé mai, mais jerálmente, tanba ita iha motto unidade espesiál nian katak, laiha loron, laiha treinu. Ne’ebé, tama iha unidade espesiál, ninia prinsípiu mak ne’e,”  Komandante Corpo Segurança Pessoal (CSP), Inspetór Xefe Marcos Lopes, hateten.

Komandante Marcos Lopes fó hanoin bá membru CPS sira hotu katak, karik iha balu moras, idade, bele halo karta bá iha administrasaun, muda bá serbisu fali iha unidade seluk. Tuir nia, ema ne’ebé serbisu iha parte operasionál nian tenke produtivu depois kontinua.

Komandante CSP ne’e esplika, kursu defeza pesoál ne’e hanesan parte ida hodi fó koñesimentu jerál de’it, atu kapasita no hasa’e koñesimentu, abilidade no atitude pesoál sira nian, bainhira hala’o serbisu iha terrenu. Hasoru ema barak ruma iha terrenu karik, asaun saida mak sira hakarak atu foti.

Iha biban ne’e, komandante CSP ne’e, husu nia membru sira atu partisipa iha kursu ne’e nafatin ho dixiplina. Tanba buat ida dixiplina ne’e, engloba buat barak, pontualidade, tenke obedese, lealdade, labele dehan buat hotu hatene hotu ona.

Iha fatin hanesan, Segundu Komandante Unidade Espesiál Polísia (UEP), Superintendente Polísia Damião Correia, garante katak, kursu ka formasaun defeza pesoál polisiál ne’e, la’ós foun bá membru sira. Maibé, durante hahú kriasaun bá unidade espesiál treinamentu sira hanesan ne’e, sempre akontese.

“Imi liu tiha ona treinamentu sira ne’e. Maibé, balu ne’ebé sei foun, balu ne’ebé derrepente ordem, imi mai tama, mais jerálmente, imi hotu iha ona koñesimentu báziku,” Superintendente Polísia Damião Correia hateten.

Nia hatutan, maske tinan barak nia laran, treinamentu sira ne’e hala’o beibeik, maibé hirak ne’e hotu mós seidauk to’o. Presiza loroloron tenke treinu, tanba bá CSP nia motto katak, laiha loron ida ne’ebé la treinu.

Segundu Komandante UEP ne’e dehan, dala-barak ona, nia sempre fó atensaun bá nia membru sira hotu, tantu bá iha unidade tomak, hahú hosi Ofisiál, Sarjentu, Ajente, tenke prepara ninia aan bainhira sei halo parte família ida iha Unidade Espesiál Polísia nian.

Unidade Espesiál Polísia iha ninia regra empenamento rasik, liu-liu ko’alia kona-bá funsaun ka misaun ne’ebé sira ne’ebé iha CSP. Dezafiu saida mak membru sira sei hasoru iha tempu mai oin.

Jornalista: Rogério Pereira Cárceres