Hatutan.com, (07 Fevereiru), Díli—Governu Timor-Leste (TL) liuhosi Ministra Negósiu Estranjeiru no Kooperasaun, Adaljiza Magno no Ministra Xefe  Norte Teritóriu Austrália, Natasha Fyles, asina akordu Parseria Estratézika, iha Parlamentu Darwin, hafoin to’o  iha Darwin, ho sasin hosi Primeiru-Ministru Taur Matan Ruak no Ministru ba Asuntu Komérsiu Austrália, Paul Kirby, iha ámbitu vizita ofisial ba Austrália, Segunda (06/02/2023).

Governu Timor-Leste no Governu Norte Teritoriu Austrália Asina Akordu Parseria Estratéjika. Foto/Média GPM.

Ministra Adaljiza Magno konsidera akordu ne’e importante tebes ba Timor-Leste no Governu Norte Teritóriu iha seitor estratéjiku sira hanesan, komérsiu, negosius, agrikultura, turizmu, petróliu no minerais no area sira seluk tan.

Lee Mós: Taur Agradese Austrália Ne’ebé Sempre Apoia Seitór Defeza-Seguransa TL

“Akordu ne’e importante teb-tebes ba Timor-Leste nomós Norte Teritóriu tanba Estadu NT ne’e halibur timoroan barak liu ne’ebé mak hela iha ne’e dezde tinan 1975 antes timoroan barak mai hela ona iha ne’e até depois Restaurasaun Independénsia,”  Hatutan.com sita deklarasaun Adaljiza Magno iha komunikadu.

Tanba iha koneksaun nomós iha relasaun ne’ebé mak forte entre ema ho ema, importante tebes ba Timor-Leste no Norte Teritóriu hodi halo akordu ida.

Norte Teritóriu Austrália  kompromitidu atu apoia Timor-Leste iha seitores barak, hanesan turizmu, agrikultura, petroleu nian, minerais, hanesan mós ezemplu konkretu ida sira halo jestaun ba krokodilu (lafaek) sira nian.

Darwin hanesan sidade ida ka Estadu ida ne’ebé mak iha jestaun di’ak teb-tebes ba krokodilu. Iha seitores bar-barak hanesan agrikultura ne’ebé mak bele halo kooperasaun di’ak, iha turizmu ne’ebé mak sira bele haruka ema Austrália sira alende de ba vizita iha Bali, sira mós bele hakat liutan ba iha Timor-Leste, ida ne’e hanesan meius ida ne’ebé mak di’ak teb-tebes ita tulun malu.

Akordu refere nu’udar kontiuasaun  akordu ida ne’ebé asina ona iha tinan 2019 ne’ebé kaduka ona tiha iha tinan 2022, enkuantu akrodu foun ne’e sei validu to’o tinan 2026.

Depois strategic partnership agreement ne’e mós hanesan estensaun ida atu halo jestaun liutan Palm Scheme.

Palm Scheme ne’e hanesan akordu ida ne’ebé mak ema hotu hatene oinsá Governu Austrália ho TL iha akordu hodi haruka traballador sira mai Austrália.

Entaun, aproveita vizita traballu Primeiru-Ministru Taur Matan Ruak nian, Adaljiza Magno ho Ministra Norte Teritóriu Austrália nian asina akordu ida ne’e Estratejiku Partnership Agreament ho sasin hosi Primeiru-Ministru ho Ministru ba Asuntu Komersiu nian hosi Austrália. Ne’e pasu importante ida hodi hametin relasaun entre Teritóriu Norte ho Timor-Leste.

Xefe Governu ho delegasaun ohin sei kontinua dezloka hosi Sidade Norte Teritóriu Darwin ba Kanberra hodi hasoru malu ho nia omólogu Australianu, Antony Albanese.

Jornalista: Rogério Pereira Cárceres