Hatutan.com, (24 Marsu 2023), Díli—Governu hahú ona sesaun Traballu Jornada Planeamentu hodi diskute, identifika no halo apresiasaun ba esbosu medidas prinsipais ne’ebé sei propoin ba Grandes Opções do Plano (GOP) ba tinan 2024.

Sesaun traballu ne’e hala’o iha Auditóriu Ministériu Finansas (MF) ne’ebé partisipa hosi Membru Governu, Prezidente Autoridade sira, Administradores Munisípál sira, Responsável Instituisaun Estadu no Órgaun Servisu Fundu Autónoma, Diretor-Jerais liñas Ministériais, Reprezentante Sosiedade Sivíl, Confissões Relijiosas, Seitór Privadu no Téknikus Finansas Públikas.

Lee Mós: Governu Diskute Mekanizmu Elaborasaun Esbosu Lei das Grandes Opções do Plano

Sesaun traballu  ne’e ho tema “Hamutuk Hadi’ak no Hametin Medidas Principais Orsamentu Jerál Estadu 2024, hodi Promove Kresimentu Inkluzivu no Sustentável” ne’ebe Prezide hosi Primeiru-Ministru, Taur Matan Ruak no modera hosi Ministru Finansas, Rui Gomes, hanesan Jornada Planeamentu ba Daruak iha istória Timor-Leste hafoin país ne’e restaura ninia independénsia iha tinan 21 liubá.

Sesaun traballu ne’e marka inísiu hosi faze primeiru prosesu Planeamentu no elaborasaun Lei das Grandes Opções do Plano ba tinan 2024.

Prosesu ne’e cumpre espíritu Lei N. º 2/2022 10 Fevereiru, Enkuadramentu Orsamentu Jerál Estadu no Jestaun Finanseira Públikas.

Rezultadu esperadu hosi Semináriu ne’e maka, Primeiru, Partisipante sira hatene kona-bá prosesu elaborasaun Grandes Opções do Plano ba 2024.

Segundu, Partisipante sira iha koñesimentu kona-bá estratéjia no mekanizmu rasionalizasaun medidas GOP 2024 hodi hetan apresiasaun ba medidas prioridades ba OJE 2024.

Sesaun ne’e hahú ho aprezentasaun hosi ekipa Diresaun Jerál Planeamentu no Orsamentu (DJPO), Ministériu Finansas kona-bá mekanizmu elaborasaun GOP, Medidas Prinsipais, Senáriu Fiskál no proposta Tetu Fiskál ba OJE 2024 nomós aprezentasaun kona-bá Prioridades Nasionál liha ba Objetivu Nasionál hosi Ajénsia Nasionál Planeamentu, Avaliasaun no Monitorizasaun (ANAPMA).

“Organiza hosi DJPO servisu hamutuk ho ANAPMA, Semináriu ne’e nia objetivu prinsipál maka atu asegura katak, medidas prinsipais ne’ebé sei kontempla iha GOP ba 2024, aliña ho Planu Estratéjiku Dezenvolvimentu, Programa Oitavu Governu Konstitusionál, Planu Estratéjiku Setorál inklui Planu Rekoperasaun Ekonómiku no halo aliñamentu ba Rezultadu Nasionál ne’ebé mak ANAPMA dezenvolve ona,”  Ministru Finansas, Rui Gomes hateten.

Elementu importante seluk iha prosesu planeamentu orsamentu ne’ebé defini iha Lei Enkuadramentu Orsamentál maka Konsultasaun Sidadania.

“Iha semana rua liubá, Ministériu Finansas hamutuk ho ekipa Liñas Ministeriais halo Konsultasaun Sidadania iha Munisípiu Aileu, Ainaro, Bobonaro, Ermera, Lautem no Viqueque,” nia informa.

Durante konsultasaun iha kada Munisípiu, ekipa halo diskusaun ho Xefe Suku sira, reprezentante Veteranu, Juventude no lider relijiozu, no involve ema besik rihun 300.

Konsultasaun Sidadania ne’e nia objetivu atu rona direta reprezentante Povu nia lian iha nível Suco, Postu Administrativu no Munisípiu konaba progresu no impaktu dezenvolvimentu nasionál hodi alkansa metas prinsipál iha redusaun pobreza.

Aleinde ne’e mós atu rekolla informasaun sira kona-bá nesesidade xave Povu nian iha nível baze atu nune’e bele uza ba análize prioritizasaun OJE 2024 ne’ebé sei kontempla iha Grandes Opções do Plano.

Ba oin, Ministériu Finansas sei kompila medidas sira ne’ebé hetan ona apresiasaun ba iha Proposta Lei das Grandes Opcões do Plano 2024 no sei aprezenta ba Konsellu Ministrus iha tempu badak nia laran antes submete ba Parlamentu Nasional iha inísiu fulan-abril hodi diskute no aprova.

Jornalista Estajiária: Dirce Sandra da Costa Gomes