Hatutan.com, (29 Marsu 2023), Díli—Tribunál Rekursu (TR) liuhosi Plenária iha Kuarta (20/03/2023) anunsia ona rezultadu númeru sorteiu hosi kada kandidatu Partidu Politiku sira ne’ebé konkorre iha eleisaun Parlamentár tinan ne’e.

Ho rezultadu ordenasaun bá númeru sorteiu ne’e maka reprezentante Partidu Polítiku sira tenke prepara no aprezenta emblema ka sigla partidu nian bá Sekretariadu Tékniku Administrasaun Eleitóral (STAE) atu bele ajusta iha buletin votu.

Lee Mós: Númeru Sorteiu Partidu Polítiku Sira Iha Eleisaun Parlamentár 2023

“Depois de Tribunál Rekursu notifika hotu tiha ita sei halo kontaktu ho reprezentante Partidu Politiku sira lori aprezenta bá iha STAE. Partidu sira-ninia sigla emblema hodi ajusta bá iha modelu buletin votus ne’ebé STAE prepara ona. Tuir tempu, aban to’o bainrua tenke hatama ona,” Diretór Jerál STAE, Acilino Manuel Branco hateten hafoin partisipa serimónia dada númeru sorteiu bá Partidu polítiku sira iha Tribunál Rekursu, Caicoli, Dili, Kuarta (29/03/2023).

Bainhira simu no halo tiha konfirmasaun bá emblema sira, STAE sei lori bá iha Comiissão Nacional das Eleições (CNE) hodi bele aprova, hamutuk ho reprezentante partidu politiku sira bá modelu ikus, molok atu lori bá iha gráfika Imprénsa Nasional Timor-Leste (INTL), ne’ebé hetan konfiansa atu bele halo ninia produsaun bá buletin votu sira.

Iha prosesu impríme, STAE husu gráfika INTL atu prodús totál buletin votu millaun-ida-resin ho ninia durasaun tempu barak liu kompara ho tempu sira seluk, purvolta fulan ida.

“Bainhira ita hahú iha dia 03 ka 04 fulan Abril, entaun sei termina tarde liu iha 12 Maiu nune’e iha 13 Maiu ita bele hahú halo distribuisaun bá munisipiu no mós bá iha estranjeiru, lori utiliza bá iha eleisaun iha 21 Maiu,” Acilino Branco hateten.

Kona-bá emblema Partidu polítiku sira bele tau fotográfia ka la’e, Diretór Alcilino dehan depende, maibé sei haree tuir Lei Eleisaun Parlamentáriu, Lei númeru 06/2006, Altera bá Lei Númeru 09/2017.

Konteúdu hosi Lei ezistente bá eleisaun Parlamentár rasik iha artigu 39 define kona-bá ninia karakteristika no mós elementu sira bá buletin votu nian.

“Agora ita hein partidu politiku sei haruka bá, depois ita sei introdús bá iha modelu ne’ebé mak iha, ita sei lori bá CNE, nune’e bele halo verifikasaun katak sigla emblema ka Bandeira sira ne’e hanesan loloos saida mak hateten iha Lei ka lae,” Acilino hateten tán.

Iha Lei eleisaun Parlamentár artigu 39 hateten katak, sigla Bandeira ka emblema sira ne’e tenke hanesan ho sigla Bandeira ka emblema sira ne’ebé mak partidu ida-idak lori bá iha prosesu inskrisaun hanesan partidu politiku.

Preokupasaun Iha Materiál

Diretór Acilino  mós sente preokupadu kona-bá materiál ninian tanba haree bá Lei ne’e to’o loron sanulu (10), sira sei bele aumenta sentru votasaun nomós estasaun votu nian.

Oras-ne’e daudaun Brigada STAE halo hela re-levantamentu iha terrenu tanba iha fatin hothotu kuaze mosu dazastre naturál barak tebtebes nune’e hamosu estragu bá uma no estrada sira.

“Entaun, ita hetan pedidu balun mai hosi komunidade, lideransa komunitária hakarak muda sentru votasaun. Foin daudaun mós bá to’o postu sira iha Dili laran ema barak tebtebes, tanba iha oras ikus sira ne’e  atendimentu bá resenseamentu atu taka ona, sira foin bá barak. Bele mós iha aumenta tán numeru eleitóres,”  Acilino hateten tán.

Bainhira iha aumentu bá numeru eleitór konserteza aumenta sentru estasaun no bele mós aumenta tán bá ninia lojistíka. Tánba ida ne’e maka preokupasaun sempre iha.

Maibé, kona-bá kuantidade ne’ebé mak STAE halo ona estimativa bá iha númeru sentru votasaun 1.500 no 1.900 Estasaun votus, kuaze 80% STAE preparadu. Falta tán de’it mak tinta liman, ne’ebé tuir planu ohin to’o iha Dili.

Iha kinta, 30 marsu 2023 STAE sei lori bá iha teste finál hamutuk ho CNE no ho reprezentante partidu politiku sira atu halo aprovasaun, hafoin lori fila-fali bá iha pais ne’ebé mak prodús atu bele prodús.

“Tuir planu sei to’o iha ne’e fim de Abril ka inisiu de Maiu atu bele halo distribuisaun. Restu, material agora iha ona STAE no ha’u orienta ona atu halo ona distribuisaun bá iha munisipiu, hahú semana ida ne’e bá oin,” diretór Acilino hateten.

Partidu Polítiku Sira Tenke Koolabora

Prezidente CNE, José Agostinho Belo husu bá partidu politiku sira atu kolabora nafatin ho órgaun eleitóral rua hanesan STAE ho CNE tanba ho prosesu dada númeru sorteiu nian, Tribunál Rekursu konklui ona.

José Belo konsidera loron ohin ne’e hanesan prosesu importante, tuir Partidu Polítiku sira-nia mehi, saida mak sira hakarak, númeru ne’ebé sira hakarak iha hotu ona.

“Agora, sira tenke koolabora ho di’ak nune’e servisu nafatin ho órgaun rua tanba Tribunál nia servisu, ohin. Prosesu para iha ne’e no aban bain-rua eleisaun la’o di’ak. Bainhira iha buat ruma depois de rezultadu sira ne’ebé iha apuramentu mak sei hato’o bá Tribunál,” nia hateten.

Husu nafatin bá Partidu polítiku sira liuhosi ninia reprezentante sira tenke halo konsultasaun tanba fiskais ninia kartaun, sira-nia asesu bá iha ema hothotu no jornalista sira atu asesu mós, tenke la’o tuir ona kalendáriu ne’ebé iha.

Jornalista: Rogério Pereira Cárceres