Hatutan.com (20 Outubru 2021), Dili—Maski kontra jogadór na’in-sia de’it, maibé Atletico Ultramar konsege manán no ‘hakoi’ mehi Nagardjo FC ne’ebé hakarak atu hakat ba primeira divizaun.

Jogu entre Atletico Ultramar ho Nagardjo FC. Foto/Abílio Gonçalves-LFA

Nagardjo FC iha mehi as hakarak konkista vitoria kontra Atletico Ultramar nune’e bele loke hikas dalan atu hakat ba primeira divizaun.

Notísia iha Relasaun:Liga Timor Leste, Porto Taibesi Manan Zebra 1-0

Maski nune’e, iha tinan ne’e Nagarjo FC seidauk iha sorte no tenke hakoi mehi ne’e ho derrota ne’ebé sofre hasoru Atletico Ultramar.

Iha jogu primeira parte, Nagarjo FC ho Atletico Ultramar hatudu jogu di’ak, maibé tama de’it ba minutu uluk Nagarjo FC ameasa kedan liu hosi bola falta iha área Atletico Ultramar.

Nagarjo FC nafatin halo esforsu iha minutu sira dahuluk no tama iha minutu 15 konsege halo ameasa mós ba Atletico Ultramar liu husi jogadór  Bendito Ximenes ne’ebé simu bola krosin hosi Jorge Alves, maibé baliza Atletico Ultramar konsege salva bola ne’e.

Atletico Ultramar nafatin iha esforsu atu sai hosi presaun maibe la konsege tanba iha minitu 21 Nagardjo FC fura uluk rede Atletico Ultramar liu hosi jogadór Jorge Alves, ne’ebé simu asisténsia hosi Bendito Ximenes.

Atletico Ultramar nafatin halo esforsu no ikus-mai iha minutu 24 muda skore ba 1:1 liu hosi golu ne’ebé prodús hosi jogadór Florindo Soares, ne’ebé simu asisténsia hosi Jaserlito de Jesus.

Tensi jogu hahu sa’e makás no parte rua nafatin halo esforsu hodi hatudu sira nia superioridade atu bele domina jogu hodi konkista vitória.

Kada liña hosi ekipa rua nafatin hatudu dixiplina hodi buka oportunidade liu hosi sutu ne’ebé iha, maibé sei falla no iha minutu 39 mosu falta ne’ebé rezulta kartaun me’an ba jogadór Atletico Ultramar, Bonifácio Cabral, tanba sikut jogadór Nagardjo FC, António Ximenes.

Situasaun ne’e obriga Atletico Ultramar tenke joga ho jogadór na’in-sanulu no primeira parte termina ho rezultadu 1:1.

Ekipa Atletico Ultramar. Foto/Abílio Gonçalves-LFA

Tama ba segunda parte, Nagarjo FC hola inisiativa hodi halo kedan atake ba Atletico Ultramar no iha minutu 46 Nagarjo FC nia jogadór Julião Soares, halo kedan golu ida hodi muda skore ba 2:1.

Atu hadi’a liña treinadór, Atletico Ultramar hola inisiativa hodi halo subtituisaun ba nia jogadór sira iha liña oin no médiu, nune’e bele aguenta ho atake ne’ebé  Nagardjo FC halo no ho tátika ne’e lori duni rezultadu, tama ba minutu 81 jogadór Arsénio Amaral hatama golu hodi  muda skore ba 2:2 no liu de’it minutu balun Atletico Ultramar muda kedan skore ba 3:2 liu husi jogadór Lexi Atok ne’ebé aproveita bola kantu.

Maske nune’e, Leksi obrigadu tenke simu kartaun me’an iha minutu 89, tamba deskonfia halo selebrasaun ne’ebé kontra regra hanesan hiit sa’e kamizola hodi taka oin. Rezultadu ne’e lori Atletico Ultramar ukun provizóriu grupu A ho pontu haat.

Treinadór Atletico Ultramar, Moises da Silva,  ba Jornalista sira hateten konsege konkista vitória ne’e tanba maioria jogadór sira iha mentalidade di’ak no sira iha esforsu atu bele halo jogu tuir orientasaun ne’ebé ekipa tékniku sira fó.

Iha parte seluk, treinador Nagardjo FC, Miguel Soares,  hateten jogu  minutus 90 mak determina no nia parte simu derrota ne’e no sei hadi’a di’ak liutan iha jogu tuir-mai maski oportunidade atu hakat ba primeira divizaun laiha ona.

Jornalista: Vito Salvadór