Hatutan.com, (13 Maiu 2023), Oé-Cusse- Bainhira partidu Congresso Nasionál Reconstrução Timorense (CNRT) bá lidera Governu da-sia, sei haree fali Lei ho lejizlasaun sira Rejiaun Administrativu Espesiál Oé-Cusse Ambeno (RAEOA).

Lee Mós : CAC Bolu Antigu Ministru Ináçio Moreira Nu’udár Sasin bá Konstrusaun Ró Haksolok

Xanana koalia ho militante no simpatizante partidu CNRT iha Postu Pasabe, Oé-Cusse. Foto/Xanana ba Ema Hotu

Prezidente partidu CNRT, Kay Rala Xanana Gusmão argumenta katak importante tebes atu haree fali Lei RAEOA nian atu bele fó kompeténsia bá Governu Sentral kontrola servisu hotu, inklui ezekusaun orsamentu sira iha RAEOA. Nune’e, orsamentu ne’ebé aloka mai iha RAEOA tenke lori benefísiu bá Oé-Cusse no Atoni oan sira.

Xanana esplika, ZEESM katak Zona Espesiál Ekonomia Sosiál Merkadu tamba ne’e dezenvolvimentu ekonómika iha RAEOA tenke bá too baze no povu hotu-hotu la’ós haree de’it bá kor partidu no grupu ka uma-laran ida de’it.

“Ha’u sei la ko’alia barak tamba planu dezenvolvimentu ba Oé-Cusse iha ona no bainhira imi hotu halibur hamutuk iha Oé-Cusse ita manan maioria absoluta iha Oé-Cusse, imi bolu ha’u ba Primeiru-Ministru, ha’u sei bá no ha’u sei kumpre saida mak ha’u promete bá imi,” Prezidente Partidu CNRT Kay Rala Xanana Gusmão hateten bá militante no simpatizante sira iha mini kampaña partidu CNRT ne’ebé hala’o iha Postu Pasabe, Oé-Cusse,  Sábadu (13/05/2023).

Koordenadór Partidu CNRT Postu Administrativu Pasabe, João da Silva Sila lori komunidade no povu tomak iha Pasabe husu ba Prezidente partidu CNRT Kay Rala Xanana Gusmão atu bainhira fila ukun tau matan bá infraestrutura bázika liu-liu estrada ligasaun sidade Oé-Cusse bá Pasabe tamba komunidade sira hasoru difikuldade iha estrada no husu mós atu rezolve disputa rai entre Timor-Leste ho Indonézia iha area Bijale  Sunan.

Koordenadór ne’e hatutan militante no simpatizante sira promete katak iha eleisaun parlamentár mai ne’e, CNRT sei manan maioria iha Pasabe, tamba ne’e CNRT ukun tenke rezolve problema disputa rai iha area Bijale Sunan ne’ebé iha Potensia boot ba agrikultura.

Postu administrativu Pasabe iha suku rua mak hanesan Abani no Malelat kompostu hosi aldeia hamutuk haat ho total abitante 7.149.

Númeru eleitór iha RAEOA ne’ebé mak Sekretariadu Tékniku Administrasaun Eleitorál (STAE) rejista atu partisipa iha eleisaun Parlamentár 2023 hamutuk 54.291, mane na’in 27681 (51%)  no feto  26.610 (49%).

Mini kampaña partidu CNRT ne’ebé halo iha RAEOA, Pasabe ne’e hetan seguransa másimu husi Polísia Nasionál Timor-Leste (PNTL) no hetan mós observasaun direita husi brigada órgaun eleitorál Comissão Nasionál das Eleições (CNE) RAEOA.

Jornalista: Vito Salvador