Hatutan.com, (07 Juñu 2023), Díli—Fenómena kombustivel rezerva mamuk iha Díli no mamuk iha territóriu nasionál la’ós ona situasaun foun mai povu iha rai ida-ne’e.

Lee Mós : Komunidade Díli Pániku ho “Rumor” Krize Kombustivel

Estoke kombustivel iha Estasuan Kombustivel sira mamuk, nune’e negosiante ambultante sira hasae folin tuir sira-nia hakarak. Foto/Francisco Belo Simões

Kada tinan no kada fulan-neen, timoroan sira, liuliu hirak ne’ebé iha transporte, hanesan karreta ho motór sempre forma naruk iha estasaun kombustivel sira iha Díli laran hodi bá enxe kombustivel bá sira-nia transporte tanba  pániku ho situasaun ne’e.

Balun fali lori ho kedas jerigen hodi sosa kombustivel tau iha karreta laran hodi lori bá uma, hanesan meiu antesipasaun bá senáriu piór  krize kombustivel bele akontese iha loron ida ka rua nia laran tuir mai.

Tuir observasaun Hatutan.com nian iha estasaun kombustivel Realistik iha Balide, loke hela maibé labele halo atendimentu bá kliente sira tanba laiha kombustivel. Situasaun hanesan mós akontese bá estasaun kombustivel rua iha área Hudi-Laran taka tanba laiha kombustivel.

Estasaun kombustivel rua iha área Fatuhada nian, portaun taka-metin tanba kombustivel laiha. Maibé, iha estasaun kombustivel empreza ETO nian iha Fatuhada loke no halo atendidmentu bá kliente sira tanba sei iha estoke kombustivel. Nune’e mós estasaun kombustivel Mekar Fuel iha Luro-Mata, Díli, kontínua halo atendimentu tanba sei iha estoke kombustivel sufisiente.

Iha fali Estasaun Kombustivel  Belac Fuel iha área Fomento, Díli mós loke, maibé la bele halo atendimentu bá kliente tanba  estoke kombustivel  mamuk. Maske nune’e, iha estada boot estasaun kombustivel refere nia oin, negosiante ambulante sira  fa’an kombustivel iha aqua ho medida 1200 mililitru  ida ho presu entre $3,00 to’o $4,00.

Na’in bá Empreza Esperansa Timor oan (ETO) Grupu, Nilton Telmo Gusmão, ne’ebé Hautan.com konfirma, Kuarta (7/6/2023),  via telefone hateten, ETO iha hela kombustivel mas bá sira-nia kliente deit.

Estoke kombustivel mamuk halo kliente estasuan kombustivel sira bá enxe kombustivel bá sira-nia motór iha negosiante ambulante sira. Foto/Francisco Belo Simões

“Ami nia ró mós sei to’o iha loron 11 fulan-Juñu ne’e,  por tanto buat hotu kontroladu hela mas bá konsumidór sira lalika pániku atu enxe kombustivel bá transporte tanba bainhira presiza tan mina la falta bá ema hotu,” Nilton Gusmão hateten.

Nilton husu atu la bele forma naruk no lakon enxe kombustivel bá transporte sira tanba estoke kombustivel ETO sei sufisiente bá ema hotu nia presiza.

Nia dehan, situasaun ne’e akontese tanba estasaun kombustivel sira agora taka ne’e tanba hatama kombustivel hosi PERTAMINA Internasionál Timor S.A, ne’ebé atualmente estoke mamuk.

Hosi sorin seluk, TANE Konsumidór konsidera katak mina mamuk afeta bá mobilidade tamba transporte depende ba mina, afeta estudante sira , traballadór sira, no populasaun em- jerál ninia dezlokasaun no afeta ekonomia tamba prejudika sirkulasaun ema ho sasán mai merkadu.

TANE Konsumidór husu bá Governu, liuliu autoridade reguladór hala’o ninia knar atu bolu atensaun bá kompañia distribuidór sira hanesan: ETO, PERTAMINA no Global atu bele presta sira-nia responsabilidade bá konsumidór no públiku.

Hatutan.com mós halo konfirmasaun asuntu ne’e bá Ministru Petróleu no Mineral, Victor da Conceição Soares iha Palásiu Governu, informa katak  Autoridade Nasional Petróleu no Minerál (ANPM) sei halo konferénsia imprensa iha tuku 14.30 Otl, relasiona ho estoke kombustivel mamuk iha Díli laran no mós territóriu nasionál.  

Jornalista : Rogério Pereira Cárceres