Hatutan.com, (17 Agostu 2023), Díli– Tribunál Judisiál  Primeira Instánsia Díli (TJPID) liuhosi Juiz Turnu, Alvaro Maria Fátima, Kinta (17/08/2023),  deside no aplika medida koasaun Aprezentasaun Periódika (AP) bá arguidu  na’in-neen (6) tanba la iha indísiu  forti hatudu katak arguidu sira envolve iha krime  konfrontu  obstrusaun autoridade no danu agravadu ne’ebé Ministériu Públiku promove bá arguidu sira.

 Ho desizaun Juiz nian ne’e, arguidu sira iha obrigasaun tuir prinsípiu lei tenke aprezenta aan iha Tribunál Judisiál Primeira Instánsia Díli kada fulan.

Arguidu sira. Foto/Elio dos Santos da Costa

“Tribunál aplika Aprezentasaun Periódika ba arguidu na’in-neen  tanba laiha faktu sufisiente no  laiha testemuña  ida atu mai deklara katak arguidu sira ne’e mak  halo perturbasaun  polisiál  no halo krime hodi estraga sasán patrimóniu estadu nian  hanesan karreta sira ne’e,” defeza José Guterres, ne’ebé fó asisténsia legal bá arguidu sira iha Tribunál hateten bá jornalista sira.

Arguidu na’in-neen  ne’e ho inisiál   JG, LJG, RS, NR, JC, no ASS nia kazu ne’e seidauk final tanba ne’e presiza tan investigasaun kle’an hodi hetan prova sufisiente. Nune’e, Defeza bá arguidu sira aseita ho desizaun hosi Tribunál ne’ebé aplika medida Aprezentasaun Periódika.

 Ministériu Públiku ne’ebé reprezenta hosi Prokuradór Domingus Barreto husu ba Tribunál atu promove medida esepsaun tuir Tribunál nia konviksaun ida ne’ebé justu tanba arguidu sira deskonfia komete krime obstrusaun autoridade ne’ebé previstu iha artigu 253 no  dano agravadu ne’ebé previstu iha artigu 243  hosi Kódigu Penál Timor-Leste.

Iha interrogatóriu dahuluk  Prokuradór Domingos Barreto iha nia alegasaun husu Tribunál atu foti medida koasaun bá arguidu sira tuir Tribunál nia konviksaun bazeia promosaun krime ne’ebé Ministériu Públiku promove bá arguidu sira.

Arguidu na’in-neen ne’e durante oras 72 nia laran detein iha sela polísia eskuadra Dom Aleixo, Díli, tanba deskonfia envolve iha konfrontu fíziku bainhira membru arte marsiál hosi Persaudaraan Setia Hati Terate (PSHT) fila hosi sira-nia atividade graduasaun.

Iha Segunda (14/08/2023), hale’u tuku 04:00 dadeer, bainhira membru PSHT sira fila hosi sira-nia serimónia graduasaun iha Tibar, ema hirak halo asaltu tuda hasoru convoy no hamosu reaje hosi membru PSHT sira hodi rezulta perturbasuan orden publika.

Jornalista Estajiáriu : Lazaro Pereira Quefi