Hatutan.com, (26 Setembru 2023), Díli-Ajenda Parlamentu Nasionál (PN), Segunda ohin (25/09/2023), atu realiza eleisaun komisáriu Komisaun Anti Korrupsaun (CAC, sigla portugés) períodu 2023-2027, maibé ajenda ne’e adia fali tanba seidauk iha konsensu entre Bankada CNRT ho FRETILIN.

Lee Mós: Xanana Gusmão Propoin Sérgio Hornai ho Rui Pereira bá Komissáriu CAC

Edifísiu CAC iha Farol, Díli. Foto/Dok.CAC

Razaun seluk ne’ebé Hatutan.com rekolla hosi fontes oioin iha Parlamentu Nasionál mós katak Bankada ne’ebé apoiu Governu hanesan, CNRT ho PD sei kompleta biográfia kandidatu na’in-rua ne’e nian. tanba ne’e, adia fali eleisaun ne’e dala-ida tan.

“Haree de’it iha plenária ne’ebá, konsensus laiha, sei la realiza. Entendimentu ne’e dehan, ita bele la’o, mais to’o pontu ida saida ne’e, bele dada tán oitoan, fó tempu tán oitoan. Ita fó tempu, ne’e maka ita entende malu. Ita buka hela atu ko’alia ho Bankada FRETILIN, ita hein took, to’o tempu ida dehan bele ajenda ona, bele ajenda ona, tanba ida-ne’e mak dehan tenke konsensus,” Xefe Bankada CNRT, Duarte Nunes, hatán bá Hatutan.com iha PN.

Deputadu Duarte Nunes, dehan, tanba seidauk iha konsensu entre partidu boot rua; CNRT ho FRETILIN, maka  to’o oras ne’e seidauk bele realiza eleisaun bá komisáriu foun CAC nian. Maibé, bankada CNRT iha PN halo nafatin hela esforsu aprosima no negoseia ho Bankada FRETILIN atu oinsá bele konserta malu.

“Ami koalia bá malu hela, ne’ebé ita hein lai, pasiénsia ne’e tenke iha, para ita buka hetan konsensus ne’e. Sé ita ida-idak foti ulun, entaun, ita la buka konsensus. Ita tenke hanoin katak, Timor ne’e ita hotu nian, ita buka dalan, para ita halo buat ruma,” Deputadu Duarte Nunes haktuir.

Iha loron 13 fulan-Setembru 2023, Konsellu Ministru propoin naran rua bá PN atu bele hili nu’udár komisáriu foun CAC nian. Sira-na’in  ne’e mak Sérgio de Jesus Fernandes da Costa Hornai ho  Rui Pereira dos Santos.

Xefe Bankada FRETILIN, Aniceto Guterres, argumenta katak Bankada FRETILIN iha ona entendimentu ruma ho Bankada CNRT, kona-bá kandidatura sira bá komisáriu CAC nian. Maibé, hanesan saida mak ohin Deputadu sira bankada CNRT a-dianta ona, katak, iha buat balu ne’ebé tenke konserta didi’ak, tanba ne’e, husu adiamentu.

“Ami tenke aserta didi’ak pontus balu, para objetivu atu oras ida komisáriu ne’ebé eleitu, komisáriu ne’ebé konsensuál, a-nível parlamentu. Tanba ne’e maka, ami husu tempu atu halo tán esforsu ruma, para atu bá aserta kestaun sira ne’e, halo loos, mais, depois, ami sei informa bá meza, uainhira loos, no ita avansa bá eleisaun,” Deputadu Aniceto Guterres, hateten durante intervensaun iha plenária.

Prezidente Bankada Partidu Demokrátiku (PD), António da Conceição “Kalohan”, fó opiniaun  mós katak bá proposta ne’ebé mak aprezenta hosi CNRT ho FRETILIN, no konsidera ida ne’e hanesan aktu ida ne’ebé mak importante tebes, hodi bele hatudu sira-ninia konsensu bá órgaun ida ne’ebé mós importante tebes no vital bá nasaun ida ne’e.

Xefe Bankada Kmanek Haburas Unidade Nasionál Timor Oan (KHUNTO), Deputada Olinda Guterres, afirma katak, KHUNTO sempre ho prontidaun tomak atu partisipa iha plenária, hodi hili komisáriu foun CAC nian liuhosi eleisaun ida diretu no sekretu.

“Iha ne’e, ami prontu hela, no husu mak ita-nia maluk sira FRETILIN,” deputada Olinda Guterres afirma.

Xefe Bankada Partidu Libertasaun Populár (PLP), Angelina Sarmento Lopes, a-favór mós bá deklarasaun sira hato’o ona hosi bankada boot rua; CNRT ho FRETILIN iha PN, no bankada PLP subskreve mós bá saida mak bankada rua hato’o, katak, presiza iha konsensu bá deliberasaun ne’ebé sira sei halo en-relasaun ho komisáriu CAC nian.

“Tanba ida kestaun ida  presiza duni konsensu entre partidu polítiku sira ne’ebé iha bankada parlamentár no sé karik iha buat ruma ita presiza konserta, antes ita avansa bá votasaun, ami submete, atu adia bá tempu seluk,” Deputada Angelina Sarmento hateten.

Hafoin rona tiha deklarasaun no pozisaun hosi kada lider bankada parlamentár sira kona-bá eleisaun bá komisáriu CAC ne’e, Prezidente Parlamentu Nasionál (PPN), Maria Fernanda Lay, deklara hodi muda loron eleisaun bá semana seluk.

“Nune’e, señores deputadus, ita adia eleisaun para próxima semana,” PPN Fernanda Lay deklara iha plenária PN.

Jornalista: Rogério Pereira Cárceres