Hatutan.com, (25 Janeiru 2023), Díli—Governu liuhosi Konsellu Ministru (KM), aprova ona projetu proposta rezolusaun Parlamentu Nasionál (PN) nian, hodi propoin eis Prokuradór Jerál Repúblika (PJR-), José Ximenes bá Komisáriu foun iha Comissão Anti Corrupção (CAC).

José Ximenes. Foto/ Média PM.

Projetu proposta rezolusaun PN nian ida-ne’e, aprezenta hosi Primeiru Ministru (PM), Taur Matan Ruak, bá dezignasaun hosi Komisáriu CAC, bá mandatu tinan-haat, tuir rejíme eskluzividade.

Ministru Prezidénsia no Konsellu Ministru (MPKM), Fidelis Manuel Leite Magalhães hateten, tuir Lei, Governu sei haruka naran bá PN hodi bele halo votasaun bá kandidatu ne’ebé governu rasik propoin tiha ona.

“Entaun, Governu ninian opsaun, nomeasaun, dezignasaun ne’ebé mak Governu halo hato’o bá Parlamentu maka José Ximenes, eis Prokuradór Jerál Repúblika,” Fidelis Manuel Leite Magalhães hatete hafoin sorumtu ordináriu Konsellu Ministru nian iha Palásiu Governu Dili, Kuarta (25/01/2023).

Portavóz Governu ne’e dehan, tuir lejizlasaun iha vigór, Parlamentu Nasionál sei análiza no vota bá naran ne’ebé hato’o hosi Governu, maske ninia dezignasaun sei nesesária bá maioria absoluta hosi deputadu reprezentante sira ne’ebé prezente, pelu-menus, baluk tolu hosi deputadu sira ne’ebé efetividade funsaun sira.

“Karik, Parlamentu liuhosi votasaun iha maka maioria absoluta konkorda ho kandidatu refere entaun, José Ximenes sei sai Komisáriu CAC tuir mai,” Fidelis Magalhães hateten.

PN ‘Hein De’it’ Propósta hosi Governu

Iha sorin seluk, Prezidente Parlamentu Nasionál (PPN), Aniceto Longuinhos Guterres hateten to’o oras ne’e PN seidauk simu proposta ruma hosi Governu, kona-bá nomeasaun bá ema ruma atu sai hanesan kandidatu bá Komisaun foun CAC nian.

Tanba ne’e, hein de’it propósta hosi Governu no bainhira proposta ne’e Governu submete ona maka PN sei halo ajendamentu bá votasaun.

“Komisáriu CAC, Parlamentu seidauk simu kandidatu. Tuir lei, ne’e Governu nia kompeténsia atu aperezenta kandidatu,” nia hateten.

Aniceto dehan, nia rasik mós hatene ona katak, mandatu Sérgio Hornai nian hanesan Komisáriu CAC, termina tiha ona iha 21 Janeiru maibé, kona-bá kandidatu foun ne’ebé sei mai, ida ne’e kestaun legál instituisaun ninian, PN mak sei rezolve internu, tanba situasaun ne’e temporáriu.

Jornalista: Rogério Pereira Cárceres