Hatutan.com, (14 Novembru 2023), Díli– Liuhosi plenária Parlamentu Nasionál (PN), Tersa (14/11/2023), membru PN hosi Bankada Partidu Demokrátiku (PD) levanta kondisaun estrada Postu Administrativu Tilomar ho Postu Administrativu Fohorem ne’ebé grave tebetebes.  

Lee Mós: Maioria Populasaun Manufahi ho Covalima Asesu Bee-Moos

Kondisaun Estrada aat sai ona preokupasuan povu hotu nian. Imajen ne’e hatudu kondisaun estarada balun iha Gleno bá Postu Administrativu Letefoho, tun to’o Postu Administrativu Atsabe grave tebtebes. Foto/ Dok. Hatutan.com

“Atu hateten katak estrada liga hosi Postu-Administrativu Tilomar, Suku Lalawa-Vila to’o Postu-Administrativu Fohorem, Munisípiu Covalima nia kondisaun grave tebes, nune’e mós estrada sira iha Tilomar liga bá Fatumea, Fatululik ho Maukatar aat liu tan.  Iha tempu udan difikulta komunidade sira hosi Postu-Administrativu refere halo movimentu mai Covalima vila,” membru Bankada PD Sancha Margarída Tilman haktuir iha plenária PN.

Nia propoin bá IX Governu Konstitusionál ne’ebé lidera hosi Primeiru-Ministru (PM), Kay Rala Xanana Gusmão atu tau konsiderasaun iha diskusaun orsamentu jerál estadu (OJE) 2024 nian.

Membru PN Deputada  Sancha Margarída Tilman hato’o mós preokupasaun komunidade iha Postu-Administrativu Fohorem ne’ebé husu atu loke fila-fali estrada hosi Aldeia Lo’o Hali liga Aldeia Sadahur ne’ebé taka hosi administradór anteriór

Deputada Sancha Margarída Tilman esplika estrada Postu Administrativu Fohorem ne’ebé taka ne’e,  iha tempu portugés no okupasaun Indonézia mai to’o tempu tranzisaun UNTAET to’o VII Governu ne’e loke no komunidade sira asesu hela. Maibé iha VIII Governu, Administradór Postu Fohorem, Carlos Carvalho fó orientasaun taka estrada refere ho razaun katak animál ka karau han ai-funan no ema soe foer iha tanki laran iha uma portu ka edifisiu laran, maibé razaun ida-ne’e la justifika tanba edifisiu refere iha pesoál seguransa.

“Hanesan reprezentante povu husu bá Governu liuhosi Ministériu Administrasaun Estatál (MAE) atu fó orientasaun bá administradór Covalima ho administradór postu Fohorem atu loke fila-fali rede arame ne’ebé iha ligasaun ho postu Fohorem ho urjentimente molok udan monu rai,” Deputada Sancha Margarída Tilman propoin.

Liga ho asuntu  estrada ne’e, Vise-Ministru asuntu Parlamentár Áderito da Costa Hugo hateten sei involve instituisaun Gestaun Estrada (IGE) hodi rezolve problema estrada iha área rurál sira.

“Kona-bá estrada ita-boot sira hatene iha IX Governu nian mandatu mai ne’e oinsá ita konsentra liubá orsamentu retefikativu ne’ebé aloká hela iha VIII Governu nian ne’e ita ajusta para ita haree ne’ebé intervenzaun kona-bá estrada rurál sira ho karaktér urjénsia tanba estraga hosi inundasaun no mós parte seluk ne’e maka ita involve hela Instituisaun Gestaun Estrada  (IGE) hodi haree bá problema estrada nian,” Vise-Ministru Asuntu Parlamentár Áderito da Costa Hugo informa.

Jornalista Estajiária : Zita Menezes