Hatutan.com, (12 Novembru 2021), Dili—Primeiru Ministru (PM), Taur Matan Ruak, apela ba joven sira iha ámbitu komemorasaun loron nasionál juventude nian katak, ohin loron tama iha mundu kompetitivu, tanba ne’e se mak la badinas sei hela iha kotuk.

Marsa hosi Igreja Motael ba Simitériu Santa Krúz, hodi komemora tinan 30 trajedia Santa Kruz 12 Novembru 1991. Foto/Altino Freitas.

“Aproveita loron ne’e, hakarak apela ba ha’u-nia oan joven sira, hadook imi nia-an hosi konflitu oioin, tanba imi monu ba kanek no mate, imi-nia-inan-aman mak sei sofre, sei lakon, tanba ne’e di’ak liu mak haka’as imi nia-an ba estudu, tanba mundu ohin loron kompetitivu, sé mak la badinas, la inovativu no la kreativu nia sei hela iha kotuk,” mensajen Xefe Guvernu nian, ba Komemorasaun Masakre Santa Krúz, ba dala 30.

Loron ohin, hanesan tinan-tinan, hanoin Juventude Loriku As’wain ho determinante no nakonu ho espíritu luta nian, hamriik hakilar ba mundu katak “Mate Ka Moris Ukun Rasik An”.

Iha loron ne’e duni, nakfila sai fali trajédia boot “Masakre Santa Krús”, joven feto no mane barak mak raan nakfakar no barak lakon to’o agora.

Ho grasa filmajen hosi ita-nia Saudozu Max Stahl nian, konsege loke mundu nia matan kona-bá trajedia nakukun ida-ne’e, ne’ebé ikus mundu internasionál preokupadu ba timoroan sira-nia sofrimentu hosi asaun burtalizmu forsa okupante sira-nian.

Governu deside mós data ida ne’e, nu’udár Loron Nasionál ba Juventude, hodi fó onra ba joven feto no mane sira ne’ebé mak masakradu iha loron refere.

“Loron ida ne’e mós nu’udár reflesaun nian, liuliu ba foin-sa’e sira ne’ebé foin boot iha era independénsia nian, tuur ba hodi reflete “saida mak ha’u bele fó ba ha’u nia nasaun!” saída mak há’u bele hatutan joven uluk nia misaun ne’ebé hatudu ona, sira harii hela Nasaun RDTL ne’ebé ohin ita hotu goza,” Taur Matan Ruak, subliña.

Marsa hosi Igreja Motael ba Simitériu Santa Krúz, hodi komemora tinan 30 trajedia Santa Kruz 12 Novembru 1991. Foto/Altino Freitas.

Nasaun ne’e hamriik tinan 19 ona, Nasaun ho tinan 19, seidauk bele fó satisfasaun ba ema hotu-hotu, tanba Estadu iha nesesidade barak tebes, enkuantu rekursu ne’ebé iha la sufisiente atu atende hotu iha tempu badak de’it.

Haree hosi esperiénsia Nasaun sira ne’ebé ukun an liu TL tinan barak, hanesan timoroan, bele orgullu tanba la’ós Nasaun ida ne’ebé di’ak liu iha mundu, maibé mós la’ós aat liu iha mundu.

Maske ho difikuldade oioin ne’ebé Governu ne’ebé Taur Matan Ruak  lidera ne’e hasoru, hanesan instabilidade polítika, resesaun ekonomia, COVID-19 no dezastre naturais, maibé la lakon esperansa, Governu sei kontinua halo esforsu hodi kria kondisaun atu nasaun la’o  nafatin ba oin, roda ekonomia mós  bele la’o nafatin hodi bele kria kondisaun ba sidadaun sira.

Governu ne’e lakohi husik timoroan ida hela iha kotuk, maibé ba ida ne’e, joven sira-nia kontribuisaun importante tebes ba estabilidade Nasaun nian.

Jornalista: Rogério Cárceres