Hatutan.com, (26 Fevereiru 2024), Díli- Embaixadóra Austrália mai Timor-Leste, Caitlin Wilson hateten Austrália iha kompromisu  atu hametin kooperasaun no promove pás no prosperidade ho nasaun sira Sudeste Aziátiku no Timor-Leste.

Lee Mós: Austrália Prontu Nafatin Apoia TL Iha Área Defeza

Deklarasaun ne’e Embaixadóra Austrália Caitlin Wilson hato’o hafoin hasoru malu ho Primeiru-Ministru Kay Rala Xanana Gusmão, Segunda (26/02/2024), hodi informa kona-bá Austrália nia preparasaun bá ASEAN Summit ne’ebé Timor-Leste sei partisipa mós hamutuk ho nasaun membru ASEAN sira iha Melbourne, Austrália.

Advertisement

Embaixadóra Austrália mai Timor-Leste, Caitlin Wilson. Foto/Elio dos Santos da Costa

“Ha’u mai hasoru malu ho Primeiru-Ministru Kay Rala Xanana, ida ne’e hanesan reuniaun preparatória ida antes Australia sai hanesan uma na’in ba Simeira Espesiál ASEAN nian, ne’ebé mak Austrália organiza semana oin iha Melbourne, Austrália husi loron 5 to’o loron 6 fulan-Marsu 2024,” Embaixadóra Austrália Caitlin Wilson informa bá jornalista sira.

Nia hatutan, Austrália kontente tebes atu simu nasaun membru ASEAN hotu nu’udár lider foin-sa’e sira no mós Primeiru Ministru Timor-Leste nu’udar nasaun adezaun foun.

Austrália  sei selebra tinan 50 nu’udar parseiru diálogu entre Austrália no nasaun sira Sudeste Aziátiku. Tuir Caitlin Wilson, ida-ne’e hanesan istória importante ida-ne’ebé istóriku hanesan Milestone no mós tempu ne’ebé importante tebes bá ema ne’ebé la’o-rai.

Iha Simeira ne’e sei organiza diskusaun kona-ba futuru rejiaun Sudeste Aziátiku nian no oinsá Austrália servisu hamutuk hodi promove pás no prosperidade.

Austrália hein ho kontente atu simu Primeiru-Ministru Kay Rala Xanana Gusmão bá dala uluk iha Austrália, liu-liu bá nia mandatu foun hanesan Xefe Governu hodi ko’alia kona-ba tópiku importante sira ne’ebé dame no prósperu.

Jornalista: Vito Salvadór

Advertisement