Hatutan.cm, (16 Abríl 2024), Díli—Conselho de Imprensa (CI) servisu hamutuk ho Australia Broadcasting Coorporation-International Development (ABC-ID) hala’o lansamentu bá Matadalan Jornalízmu Inkluzivu.

Conselho de Imprensa (CI) servisu hamutuk ho Australia Broadcasting Coorporation-International Development (ABC-ID) hala’o lansamentu bá Matadalan Jornalízmu Inkluzivu, iha Suai Room, Timor Plaza, tersa (16/04/2024). Foto: Elio dos Santos da Costa.

Prezidente CI, Otelio Ote hateten, prossesu molok to’o iha faze lansamentu ne’e uza tempu naruk hodi halo peskiza bá konteúdu inkluzivu nian.

Lee Mós: Matadalan Reportajen Eleitorál ba Jornalista no Meiu Komunikasaun Sosiál Sira

Tanba ne’e, CI hanesan órgaun reguladór ida ne’ebé iha kompeténsia atu eleva kapasidade jornalista sira no livru ida-ne’e util tebes bá jornalista sira iha territoriu Timor Leste.

“Jornalista barak halo ona prátika no halo ona produtu jornalistiku. Maibé, barak mak seidauk intende kona-bá oinsá halo reportajen bá notisia sira ho inkluzivu. Livru ida ne’e sei guia ita atu produs notisia sira lorloron involve ema hotu no grupu sosiál hotu-hotu,” Otelio Ote hateten iha Suai Room, Timor Plaza, tersa (16/04/2024).

Nia hein katak jestór média no jornalista sira hotu uza livru ida-ne’e ho di’ak atu bele gia iha prosesu kobertura no mós editing notisia to’o prosessu publikasaun.

Conselho de Imprensa (CI) servisu hamutuk ho Australia Broadcasting Coorporation-International Development (ABC-ID) hala’o lansamentu bá Matadalan Jornalízmu Inkluzivu, iha Suai Room, Timor Plaza, tersa (16/04/2024). Foto: Elio dos Santos da Costa.

Iha fatin hanesan diretór  ABC Internasional Development, Aaron Kearney orgullu tanba bele parseria ho CI bá publikasaun matadalan inkluzivu liga ho jornalista sira.

“Ami servisu hela ho CI hanesan ABC Internasional development ho ninia programa atu halo dezenvolvimentu bá média iha Timor Leste. Iha tinan kotuk ami servisu hamutuk no fornese formasaun iha Balibo no mós formasaun ba abilidade fundamentál jornalizmu nian iha  Oecusse no mos iha Dili,” Aaron Kearney hateten.

ABC Internasional development ninia servisu iha Timor-Leste finansia hosi Governu Austrália nune’e maka servisu besik ho CI hodi mellora povu Timor Leste nia moris di’ak.

Matadalan ida-ne’e ajuda tebes CI nia misaun no ambisaun hodi hakle’an média sira nia komprensaun hodi kria imajen ne’ebé ho loos no ida-ne’e bele hasa’e komprensaun no empatia ba lee, rona nain sira atu lori sosiedade ida ne’ebé mak inkluzivu no justu liu tán.

Iha fatin hanesan Ajuntu PDHJ ba Asuntu Boa Governasaun, Rigoberto Monteiro hateten, Matadalan ne’e iha buat rua, ida maka oinsa atu eleva kapasidade jornalista sira no ida seluk maka oinsa atu jornalista sira kontribui hodi kria sosiedade ida ne’ebé mak inkluzivu nuudár objetivu prinsipál.

Dokumentu ida ne’e mós kontribui ba knaar no kompeténsia PDHJ nian ne’ebé kontempla iha artigu 27 K-RDTL katak fó satisfasaun ba sidadania.

“Ita media hakerek notisia di’ak relasaun ho sosiedade inkluziva automatikamente ita nia sosiedade defisiensia sira no sira seluk senti kontenti. Katak, ita fó satisfasaun ida ne’e mak importánsia hosi produsaun Matadalan ne’e au mezmu tempu mós eleva kapasidade profisionais jornalista sira nian,” Rigoberto Monteiro hateten.

Nia husu jornalista sira atu hekerek uza termolojia ne’ebé loos no labele sala tanba ne’e jornalista no editór sira presiza haree matadalan ne’ebé mak agora lansa.

Conselho de Imprensa (CI) servisu hamutuk ho Australia Broadcasting Coorporation-International Development (ABC-ID) hala’o lansamentu bá Matadalan Jornalízmu Inkluzivu, iha Suai Room, Timor Plaza, tersa (16/04/2024). Foto: Elio dos Santos da Costa.

Reprezentante  Sekretáriu Estadu Igualdade no Inkluzaun, diretór jerál Armando da Costa dehan, igualdade ne’e nia baze loloos maka rekoñesimentu bá diversidade.

Bainhira iha sosiedade ida ne’ebé mak iha komponente hotu igual ona, entaun la presiza tán atu ko’alia ba igualdade tanba hotu-hotu hanesan, tanba ne’e maka diversidade iha hanoin, dignidade, sexu,  politika, relijiaun, kultura, lingua no sira seluk tan.

Livru matadalan jornalízmu inkluzivu bele ajuda jornalista sira iha prosesu kobertura, hakerek notisia no halo edisaun ba notisia sira no publika lihusi mídia hodi bele fasilita komunidade sira kompriende didiak kona-ba inkluzivu ne’e rasik hodi la halo diskriminasaun iha sosiedade nia leet. Matadalan Jornalízmu Inkluzivu bele ajuda jornalista sira iha nível kapasidade intelektual no professional ninian.

Dezenvolve no Produsaun Matadalan Jornalízmu Inkluzivu ne’e hetan Apoiu husi ustralia Broadcasting Coorporation-International Development (ABC-ID), liuhusi akordu kooperasaun ne’ebé estabelese iha loron 6 Juñu 2023, iha postu administrativu Balibo, munisípiu Bobonaro.

Lansamentu Matadalan ne’e CI halo bad ala tolu ona; bá dahuluk Matadalan Reportajen Eleisaun, Segundu maka Matdalana sensivel jéneru no bá Datoluk maka Matadalan reportajen inkluzivu.

Jornalista Estajiáriu:  Lázaro Pereira Quefi