Hatutan.com, (24 Novembru 2021), Díli—Tranzasaun ilegál konntinua akontese iha liña fronteira terrestre Timor-Leste no Indonézia.

Portavós Komandu PNTL halo kónferensia imprensa. Foto/Hatutan.com

Relatóriu semanál  hosi Komandu Polísia Nasionál Timor-Leste (PNTL), hatudu katak, durante hosi loron 19 mai to’o iha loron 23 fulan-Novembru 2021, Unidade Patrullamentu Fronteira (UPF) kontinua halo detensaun no kapturasaun ba autór sira ne’ebé envolve iha atividade tranzasaun ilegál ne’e.

Iha 19 fulan-Novembru 2021, tuku 10:30 Otl, Komandu PNTL Munisípiu Bobonaro, halo atuasaun ba sasán ne’ebé mak konsidera kontra bandu mak hanesan kilat-anin modelu sharp tiger lolon ualu (8) ho fogete kaixa tolu (3), inklui detein mós suspeitu ho inisiál DT (tinan 40) hela iha área Tunubibi.

“Suspeitu ho sasán sira-ne’e, agora daudauk iha hela komandu Maliana hodi submete ba iha Ministériu Públiku,” Portavós Komandu PNTL, Superintendente Xefe Arnaldo de Araújo, informa ba jornalista sira iha Kuartél Jerál PNTL, Caicoli, Díli, Kuarta (24/11/2021).

Advertisement

Iha fali 23 fulan-Novembru 2021, tuku 11 liu, Unidade Patrullamentu Fronteira (UPF), Postu Derok-neen, kaptura estudante na’in-rua ne’ebé mak tama ilegál, tanba sira nia pasaporte mate, no oras ne’e daudauk komandu UPF Bobonaro entrega ona ba iha ekipa saúde iha kuarentena Batugade.

Iha tuku 12 kalan Otl, 23 fulan-Novembru 2021, liuhosi atividade pasa-revista, Komandu UPF konsege identifika ema na’in-rua ne’ebé mak utiliza motor rua (2) hodi ba foti sasán ne’ebé maka haruka hosi Indonézia.

Sasán ka atributu arte marsiál nian ho nia par hamutuk 145 no sidadaun na’in-rua, oras ne’e komandu UPF halo hela identifikasaun, hodi entrega ba iha komandu Munisípiu Bobonaro.

Iha loron hanesan PNTL liuhosi komandu Munisípiu Bobonaro ho UPF hetan fogete abandonadu, ne’ebé mak husik hela iha dalan no sira konsege foti fogete sira-ne’e ba rai hela iha komandu munisípiu, tanba na’in laiha atu responsabiliza.

Iha 23 fulan-Novembru 2021, Komandu UPF iha Oé-Cusse, halo atuasaun tán ba sidadaun sira balu iha área fronteira, hodi prende gazolina hamutuk jerigén ualu (8) no oras ne’e daudauk entrega ona ba komandu RAEOA hodi halo identifikasaun no investigasaun.

Advertisement

Tuir dadus, durante semana ida nia laran, hahú hosi 22 to’o 24 fulan-Novemru ne’e, komandu PNTL rejista totál kazu insidente 24, ne’ebé maka mosu iha territóriu nasionál. Kazu sira-ne’e dominante liu maka kazu asalta-malu.

Jornalista: Rogério Pereira Cárceres