Hatutan.com (23 Outubru 2024), Díli—Proposta Orsamentu Jerál Estadu (OJE) tinan 2025 bá Rejiaun Administrativa Espesiál Oecusse Ambeno (RAEOA) ho montante millaun $62.181, ne’ebé fahe bá fontes finansiamentu Autoridade RAEOA millaun $36.1473 no fontes finansiamentu Fundu Espesiál Dezenvolviementu millaun $26.179.527.

Iha audiénsia públika ho Parlamentu Nasionál Komisaun C ne’ebé trata asuntu Finansas no Adminstrasaun Públika ho Prezidenti Autoridade RAEOA, Rogério Tiago Lobato ho ekipa, deputadu sira husu atu dezenvolve área produtivu sira liuliu área ekonomia, nune’e labele depende bebeik bá fundu petrolíferu.

Lee Mós: Rogério Lobato iha Programa Prioridade Hitu Durante Mandatu iha RAEOA

Deputadu Bankada FRETILIN, Antoninho Bianco hateten, kada tinan Governu sempre aloka osan atu dezenvolve produsaun barak iha RAEOA maibé to’o agora rezultadu laiha.

“Fó dadus mai ami atu bele haree dezenvolvimentu ekonomia ne’e oinsá. Ita-nia produsaun ekonomia iha ka la’e. Ita tenke dezenvolve área produtivu sira. Se la iha entaun dezenvolvimentu laiha no ita mak depende de’it bá mina hodi gasta de’it osan,” Antoninho Bianco hateten iha Plenária, kuarta 23/10/2024).

Nune’e mós deputada Bankada CNRT, Aliança da Conceição Araújo preokupa ho ezekusaun OJE 2024 ne’ebé sei ki’ik tebes bazeia bá portál transparânsia ho razaun saida.

Aliança da Conceição Araújo relata katak, ezekusaun OJE 2024 bá programa dezenvovlimentu rurál no urbanu atinje 0,5%, asesu justisa 9.7%, dezenvolviementu bá tratamentu administrativu ekonómiku espesiál 14.4%, inkluzaun sosiál 23.9%, Turizmu 14.4%, investimentu no diversifikasaun ekonómika 14.7% no jestaun sustentável rekursu naturais utilizasaun no konservasaun 8.6%.

Nune’e, Prezidente Komisaun C, Cedelizia Faria dos Santos husu bá Prezidente RAEOA Rogério Tiago Lobato atu ezekuta OJE 2025 ho di’ak atu halo mudansa no buka retornu tanba osan alokadu bá RAEOA ho montante ne’ebé boot.

“Ami husu bá ita boot sira sé bele karik 2025 ita iha osan ne’ebé aloka boot iha ne’ebá buka meius oinsá bele hasa’e reseita atu ita labele foti beibeik osan hosi administrasaun sentrál,” deputada ne’e hateten.

Maski iha proposta OJE 2025 hamutuk millaun $62-resin maibé orsamentu bá kapitál menór laiha, tanba ne’e Prezidente RAEOA Rogério Tiago Lobato husu bá Parlamentu Nasionál atu aumenta tán osan audisonál ruma bá kapitál menór.

Tuir Rogério Tiago Lobato, Prioridade RAEOA bá tinan 2025 maka kontinua dezenvolvimentu infraestrutura iha área hanesan, hadi’a kondisaun bá turizmu relijiozu, hadi’a kondisaun postu-administrativa, hadi’a estrada iha área rurál no urbana, mellora kondisaun edukasuan, mellora kondisaun saúde, lori bee moos bá komunidade, garantia eletrisidade lakan oras 24, mantein proteze kualidade agrikultura rota do sandalo, mellora kondisaun merkadu, mellora kondisaun agrikultura no hadi’a kondisaun seluk ne’ebé nesesáriu.

Iha OJE tinan 2024, Governu prevee millaun $60 bá RAEOA ne’ebé fahe bá fontes finansiamentu rua mak hanesan, fontes finansiamentu RAEOA millaun $40 no Fundu Espesiál Dezenvolviementu (FED)ho  montante millaun $20 ne’ebé fahe tán bá kategoria saláriu vensimentu, bens servisu, transferénsia públika, kapitál menór no kapitál dezenvolvimentu.

Tuir relatóriu ne’ebé fó-sai ezekusaun bá OJE 2024 millaun $60 iha RAEOA, daudaun ne’e atinje 43.13%, kapitál dezenvolvimentu atinje 18.74%, hosi ne’e fahe bá fontes finansiamentu rua mak hanesan,  ezekusaun fontes finansiamentu RAEOA nian atinje 40.33%, kapitál dezenvolviementu 12.75%, no fontes ezekusaun Fundu Espesiál Dezenvolviementu atinje 48.74% ho kapital dezenvolvimentu atinje ona 27.72%.

Jornalista Estajiária: Zita Menezes