Hatutan.com, (31 Dezembru 2024), Viqueque-Pároku ba Igraja Imaculada Conceição Viqueque, Thomas de Aquino Guterres Lopes,  husu ema hotu atu hasa’e agradese no obrigadu ba Na’i Maromak ne’ebé fó ona nia domin no iis moris ba ema ida-idak.

Lee Mós: Hamutuk Agradese bá Tinan 2024, Hakat Simu Tinan Foun ho Ksolok no Esperansa

Missa “Te Deum” iha Igreja Parókia Imaculada Conceição Viqueque, 31 Dezembru 2024. Foto/Zita Menezes

Amu Pároku Thomas de Aquino Guterres Lopes  hateten lia-hirak ne’e iha nia omilia bainhira prezide misa kalan simu tinan foun iha Igreja Imaculada Conceição Viqueque, 31 fulan-Dezembru 2024.

“Misa ida-ne’e  fó hanoin ba ita atu fó agradese uluk nana’in ba Na’i Maromak ba moris ne’ebé Maromak haraik ona ba ita ida-idak, ita hakarak hasa’e agradese ba Na’i Maromak ba moris ne’ebé ita simu ona no hala’o ona iha tinan 2024 nian laran,” Padre Thomas de Aquino Guterres Lopes hateten.

Hanesan ema kriatura, hanesan Maromak nian oan, tuir Saserdote ne’e katak hotu-hotu hasa’e agradese  ba Na’i maromak, buat ne’ebé  hasa’e husi ema ida-idak nia án ho fuan furak liu mak liafuan agradese no obrigadu.

Amu Pároku ne’e hateten buat di’ak aat ne’ebé akontese iha tinan 2024 ne’e planu Na’i maromak nian, tanba  Maromak halo buat hotu  fó domin no fó no mós ba iis moris ne’e rasik.

“Iha Tinan foun ida-ne’e ita buka atu hakbesik án liubá Aman Maromak, ita presiza agradese mós ba ema hotu-hotu husu atu iha tinan foun moris foun ida-ne’e, husu ema hotu-hotu no mós ba joven sira nafatin iha responsabilidade hodi kria dame no pás iha moris,” Amu Thomas Aquino hateten.

Jornalista Estajiária: Zita Menezes