Hatutan.com, (17 Marsu 2025), Díli– Membru Parlamentu Nasionál sira husu Governu liuhosi Ministériu Agrikultura, Pekuária, Peska no Floresta (MAPPF) atu nafatin tau-matan no próteze irrigasaun Galata iha Munisípiu Baucau tanba Governu gasta orsamentu millaun $14 bá irrigasaun ne’e.

Lee Mós: Prezidente Repúblika Vizita Irrigasaun Galata Ne’ebé Fornese Bee Ba Natar Ektare 600

Prezidente Repúblika, José Ramos-Horta haree kondisaun irrigasuan Galata. Foto/Lazaro Pereira Quefi

Membru  Bankada CNRT Saúl Salvador hateten iha semana kotuk komisaun D-PN ne’ebé trata asuntu Ekonomia no Dezenvolvimentu halo fiskalizasaun iha Munisípiu Baucau haree direita irrigasaun Galata iha kualidade no lori Komisaun D nian naran apresia bá MAPPF  ne’ebé mak konstrui ona irrigasaun Galata.

Irrigasaun ne’e fó benefisia bá agrikultura sira no natar ektare 600 iha Postu-Administrativu haat iha Munisípiu Baucau inklui mós iha Munisípiu Viqueque.

“Ami observa katak irrigasaun ne’e iha duni kualidade no natar na’in sira mós komesa halo natar ida-ne’e kapás tebes. Maibé, husu nafatin bá MAPPF nafatin tau-matan no halo protesaun,” Deputadu Saúl Salvador hateten iha nia intervensaun iha plenária PN, Segunda (17/03/2025).

“Tanba ita gasta osan boot bá irrigasaun ne’e entaun ita nafatin halo manutensaun no protesaun bá irrigasaun refere atu labele hetan estragu,” Nia tenik.

Hatán bá kestaun ne’e Vise-Ministru Asuntu Parlamentár Adérito da Costa Hugo haktuir nian parte sei hato’o asuntu ne’e bá Ministériu relevante atu bele tau atensaun bá irrigasaun referé.

Konstrusaun irrigasaun Galata finansia husi Orsamentu Jerál Estadu ne’ebé prevee iha Fundu Infraestrutura ho valor millaun $14.

Jornalista Estajiária: Zita Menezes