Hatutan.com, (05 Fevereiru 2026), Díli-Kandidatu ajente Polísia Nasionál Timor-Leste (PNTL) kuaze ema na’in-50, Kinta (05/02/2026), submete keixa ba Provedór Direitu Umanu no Justisa (PDHJ) hodi kontesta prosesu rekrutamentu kedades PNTL 2025 ne’ebé dekonfia hamosu pratika familiarizmu.

Lee Mós: Deskonfia, Familiarizmu iha Rekrutamentu Kadetes Foun PNTL

Jornalista sira halo konfirmasaun ho Provedór Virgílio da Silva Guterres, hafoin simu kandidatu ajente PNTL na’in-50 ne’ebé submete keixa kontra komisaun rekrutamentu PNTL 2025. Foto/Juvinal Cabral dos Santos

Tuir observasun Hatutan.com iha edifisiu provizoriu  PDHJ nian iha Otel Excelsior Resort, Bebonuk, Kinta-ne’e, hale’u tuku 11:20 dadeer Otl, kandidatu ajente PNTL nain-50 resin aprezenta  keixa ba PDHJ tanba sira nia naran tama hotu iha lista aprovadu, maibé komisaun rekrutamentu eskolla deit ema na’in-400  mak hakat ba faze teste médiku.

Kandidatu ajente PNTL sira hatama keixa ne’e konsidera prosesu rekrutamentu ne’e deskonfia iha tendénsia hatama família tanba sira iha prova katak superior PNTL nia família sira aprovadu ho númeru ki’ik, maske balun lakon iha teste fiziku.

Iha sorumutu ne’e, reprezentante kandidatu na’in-hitu tama iha sala enkontru PDHJ hodi hato’o preokupasaun ba  Provedór  Virgílio da Silva Guterres “Lamukan” atu akompaña kandidatu sira nia direitu ba prosesu rekrutamentu ne’ebé hamosu konfuzaun no familiarizmu iha lista kandidatu hodi kontinua ba teste médiku nian.

“Ohin, aprezentasun ne’e, ami konsidera mós keixa ida ne’ebé tama mai iha PDHJ sei haree keixa ne’e lori atu komité jestaun keixa nian deside iha nesesidade ka lae atu halo investigasaun,”  Provedór Virgílio da Silva Guterres “Lamukan” haktuir ba jornalista sira hafoin simu keixa husu reprezentan kandidatu ajente PNTL sira.

Nia informa, mais ida ne’e depende ba relatóriu prelimenar, avaliasaun prelimenár husi keixa nian atu haree.

Ba keixa ne’e, PDHJ deside atu halo iha pontu tolu; primeiru, PDHJ uza nia kompeténsia atu halo komunikasaun polítika ho entidade relevante ba ida kazu ne’e, hanesan Ministériu Interiór (MI) no mós Komisariu Jerál PNTL nian atu halo komunikasaun kona-ba prosesu ne’e buka hatene detallu prosedimentu sira.

Segundu, orienta ona diresaun fiskalizasaun atu hahú ohin buka averigua no buka hetan dokumentu sira liuliu kona-bá desizaun ne’ebé alin sira aprezenta katak la admiti sira ba faze teste médiku nian.

Terseiru, orienta mós ekipa legál ninian atu halo analiza ba dokumentus legais sira primeiru jornál Repúblika ne’ebé públika sai prosesu rekrutamentu ne’e atu haree mekanizmu sira  ne’ebé sai iha jornál Repúblika ne’e ko’alia saida.

“Sé prosesu eleminatóriu entaun tenke konfirma iha faze ezekusaun rekrutamentu ne’e   konsistente duni ho konteudu Jornál Repúblika fó sai eleminatóriu ka lae, sé Jornál Repúblika aprezenta dehan eleminatóriu, depois mai fali  prosesu akumulativu fali, ne’e la iha konsisténsia,” Provedór Virgílio Guterres hateten.

Nia salienta, parte legál sei haree atu ikus mai buat maximu ne’ebé provedor halo ne’e mak husi analiza legál no parte fiskalizasaun nian sei hato’o rekomendasaun ruma.

Jornalista: Juvinal Cabral dos Santos