Hatutan.com, (10 Dezembru 2021), Dili—Deputadu sira iha Parlamentu Nasionál (PN), aprova ona Orsamentu Jerál Estadu (OJE) tinan 2022, ne’ebé propoin hosi Ministériu Ensinu Superiór Siénsia no Kultura (MESSK) hamutuk $5.186.739  iha faze espesialidade ho votus afavór 42, kontra 0 no abstensaun 17.

Depudata Olinda Guterres iha Votasaun OJE 2022. Foto/Média PN.

“Orsamentu ba MESSK pasa,” Prezidente Parlamentu Nasionál (PPN), Aniceto Longuinhos Lopes Guterres, lee rezultadu votasaun iha plenária, iha faze espesialidade, Sesta (10/12/2021).

Notísia iha Relasaun:OJE 2022 Pasa iha Jeneralidade ho Votus Afavór 44, Kontra 0 no Abstensaun 21

Propósta Orsamentu Jerál Estadu (OJE) tinan 2022 ba MESSK ho montante $5.186.739, fahe ba kategoria Saláriu no Vensimentu $1.805.901, Bens no Servisu $2.871.838, Transferénsia Públika $314.000, Kapitál Menór zero no Kapitál Dezenvolvimentu rihun $195.

Orsamentu MESSK ne’e sei finansia ba programa tolu mak hanesan, Kultura no Patrimóniu $1.215.876, Governasaun Di’ak no Jestaun Institusionál $2.158.828, Edukasaun no Formasaun $1.812.035.

Iha 03 Dezembru 2021, PN aprova Orsamentu Jerál Estadu (OJE) 2022 ho montante billiaun $1.6 iha diskusaun faze jeneralidade ho votus a favór 44, kontra 0 no abstensaun 21.

Jornalista: Rogério Pereira Cárceres