Hatutan.com, (12 Dezembru 2021), Díli—Udan-boot  oras ida liu iha kapitál Díli no fatin sira seluk tan iha territóriu nasionál,  Domingu loraik (12/12/2021), lori inundasaun iha bairru no aldeia sira balun iha Díli laran.

Notísia iha Relasaun: Aitana FC Rekolla Vitória Dahuluk Kontra As Ponta Leste 2:1

Udan halo bee nalihun maka’as iha Estádiu Munisipál Díli husi kampu-laran to’o tribune. Foto/Hatutan.com

Udan-boot loraik ne’e mós perturba tiha atividade jogu primeira divizaun Liga Futeból Timor-Leste (LFTL) iha Estádiu Munisipál Díli tanba udan halo bee-nalihun maka’as iha kampu-laran.

Tuir oráriu jogu nian katak, iha loraik ne’e ekipa Karketu Dili Fc kontra Lalenok United Fc iha  jornada dalimak nian, maibé tanba udan halo bee-nalihun maka’as iha kampu-laran, nune’e órgaun  liga deside adia ka muda jogu ne’e ba fali Segunda (13/12/2021).

Tuir previzaun tempu husi serbisu meteorolojia no geofisika Timor-Leste nian, katak iha loron Domingu (12/12/2021), sei akontese akontese udan ho velosidade as ho grau 26 selsiu iha parte loraik.

Governu liuhusi Sekretáriu Estadu Protesaun Sivíl (SEPS) mós hasai ona alerta antes ne’e liuhosi meiu komunikasaun oioin, inklui fahe mensajen SMS liuhusi operadór telekomunikasaun sira hodi fó alerta urjente katak, iha loron 9 to’o loron 12 fulan-Dezembru 2021, sei akontese udan-boot iha Munisípiu12 no Rejiaun Administrativu Espesiál Oé-Cusse Ambeno (RAEOA). Nune’e, husu atu komunidade hases-an no rai dokumentu importante ba fatin as, hamate kuadru eletrisidade banhira bee-sa’e.

Koordenadór Jerál ka Match Comisioner LFTL, Martinho Ribeiro, konvoka enkontru urjente ho dirijente klube Karketu Dili Fc no Lalenok United Fc hodi husu sira-nia paresér atu jogu ekipa rua nian adia ba  segunda (13/12/2021) tanba kauza husi forsa maiór ne’ebé iha (udan-boot).

Liuhusi enkontru ne’e parte rua konkorda ho LFTL atu adia jogu ne’e ba loron tuir mai tanba kondisaun kampu la favoravel atu ekipa rua halo jogu.

Observasaun Hatutan.com iha Estádiu Munisipál Díli, hatudu katak edifísiu estádiu nian iha entrada VVIP no VIP kuaze bee tama no tribune sira parte loro-monu nian udan-been tama no adeptu sira ne’ebé ho entuziazmu atu asiste jogu ne’e bokon hotu.

Jornalista: Vito Salvadór