Hatutan.com, (29 Maiu 2026), Díli-Polísia Nasionál Timor-Leste (PNTL) liu husi Diresaun Servisu Investigasaun Kriminál (DSIK) submeter ona kart aba Tribunál atu husu halo autopsia ba mate isin Constâncio Saldanha Bere no husu mós atu hasai mandadu kapturasuan ba suspeitu sira ne’ebé envolve ho matebian Constâncio iha área Bidau Kuluhun, Aldeia Toko Baru 2, Suku Kuluhun, Postu Administrativu Cristo Rei, Munisípiu Díli.

Portavós Polísia Nasionál Timor-Leste (PNTL), Superintendente-Xefe Polísia João Belo dos Reis. Foto/Juvinal Cabral dos Santos

Kazu omesidiu ne’e akontese iha Sesta  madrugada (29/05/2026), hale’u tuku 02:00 Otl no Polísia deskonfia kazu ne’e iha rewlasuan ho disputa rai.

“Ekipa Forensik hetan kontaktu husi populasaun sira iha área ne’ebá katak akontese deskonfia kazu oho malu tanba rai,” Portavós Komandu Jerál Polísia Nasionál Timor-Leste (PNTL) Superintendente-Xefe Polísia João Belo dos Reis, haktuir ba jornalista sira  iha Kuartel Jerál PNTL.

Portavós PNTL ne’e afirma, hafoin rona informasaun ekipa desloka kedas ba iha fatin akontesimentu hetan sidadaun ida ho naran Constâncio Saldanha Bere, idade 19, mate iha fatin.

“Agora daudaun ami evakua ona mai iha mortuariu Hospital Nasionál Guido Valadares (HNGV) hodi hein prosesu autopasia, ami mós halo ona karta ba iha Tribunál atu hetan mandadu autopsia nian,”  Superintendente-Xefe Polísia Joao Belo dos Reis hateten

Nia hatutan, agora dadaun suspeitu halo tracking espera katak bele kaptura iha tempu badak, kazu ne’e registu ona ho Númeru Uniku Krime (NUK):0164/26.DIBCR.

“Iha vítima nia ulun hetan taa, no ha’u foin hetan informasaun iha tuku 09:00 Otl dader karik dadus kompletu ona ha’u sei update ba ita boot sira, ha’u labele hateten sai uluk saida mak akontese iha ne’ebá tanba prosesu identifikasaun la’o hela,” Portavós PNTL ne’e infoma.

Nia dehan, Forensik hamutuk doutor sira iha HNGV hein hela mandadu autopsia husi Tribunál hodi prosesu ba autopsia no mate isin ne’e sei asegura hela iha Mortuario hodi submete ba prosesu autopsia hodi hatene kauza mate no maneira mate.

Jornalista: Juvinal Cabral dos Santos