Hatutan.com, (15 Dezembru 2021), Díli—Ró Berlin-Ramelau ne’ebé ko-finansiamentu hamutuk entre Governu Alemaña no Timor-Leste (TL), sei akumula pasajeiru 308 to’o 350 hosi Díli-Atauro-Oé-Cusse no hosi Oé-Cusse-Atauro-Díli.

Oras ne’e daudaun ró Berlin-Ramelau sei iha responsabilidade kompañia, tanba seidauk iha termu de intrega.

Notísia iha Relasaun:Berlin-Ramelau Rejistu iha IMO La’ós ho Bandeira RDTL

Tanba ne’e, tuir planu Governu nian serimónia inaugurasaun no termu de entrega sei hala’o iha loron segunda 20 Dezembru iha tuku 9:00 dader.

Governu sei realiza Termo de entrega tanba inspeksaun konjunta remata ona iha loron Sábadu ne’ebé kompostu hosi kompañia, konsultán, Administrasaun Portuáriu Timor Leste (APORTIL) no Diresaun Transporte Marítima.

Rezultadu inspesaun ne’e hatudu katak, ró ne’e ho kondisaun di’ak no bele halo operasaun depois de inaugurasaun no entrega ba Governu.

“Ró ne’e modernu liu ona, tanba ne’e rezultadu inspesaun hatudu katak, kondisaun ró di’ak no prontu atu halo operasaun,” Prezidente APORTIL, Flávio das Neves hateten ba Hatutan.com iha Edifísiu MTK, Caicoli, Kuarta (15/12/2021).

Flávio das Neves informa rezultadu inspesaun ne’e hatudu katak, ró ne’e standard Europa ne’ebé modernu liu, maski halo iha Xina tanba iha kapasidade bele akumula pasajeiru 308-350, bele tula karreta 12-15 iha fatin ne’ebé di’ak ba ema ho defisiente, iha mos fatin kaixaun ne’ebé bele tula ema mate no uza remote bainhira atu atraka.

Tanba ne’e, laiha dúvida ba rò nia kondisaun ne’ebé luxu, tanba dezeñu ró bazeia ba difikuldade ne’ebé populasaun enfrenta.

“Kona-bá operasaun ró ne’e, sei depende ba nesesidade komunidade. Maibé, tama ona iha fulan Dezembru kuandu ema barak entaun operasaun tenki rutina. Bainhira ema laiha maka sei tuir oráriu Berlin-Nakroman semana ida dala rua,” nia esplika.

Prezidente APORTIL ne’e seidauk bele pronunsia folin billete tanba Governu mak sei deside liu hosi reuniaun Konsellu Ministru (KM), tanba Berlin-Nakroman mós Governu mak deside, maibé Governu sei la haree ba montante reseita ne’ebé sei hetan, importante maka bele garante konektividade Oecusse no Ataúro la’o nafatin.

Daudaun ne’e, parte APORTIL elabora hela relatóriu inspesaun hodi entrega ba Ministériu Finansa, nune’e bele realiza pagamentu tanba Governu seidauk halo pagamentu ba millaun $4.2, maibé depois de hatama relatóriu inspesaun bele prosesa pagamentu.

Daudaun ne’e Timor oan hamutuk 14 mak hala’o servisu iha ró laran, hanesan tripulante inklui kapitaun ró ho naran Mauricio, maibé sei presija ema na’in-tolu iha área tékniku mákina nian, eletrisidade no kapitaun ida atu bele ajuda inklui ema profisionál balun hodi akompaña Timor oan sira, prioridade liu ba ema Timoroan tanba daudaun ne’e tékniku sira mai hosi Olanda mak halo akompañamentu, to’o loron 29 Dezembru.

Presija Fatin ba Manutensaun

APORTIL husu Governu atu bele kria fatin manutensaun ba ró iha Timor tanba dalabarak tenke halo iha rai-liur ne’ebé la garante ninia utilizasaun.

Ró Berlin-Ramelau atraka iha Portu Díli iha loron 10 Dezembru 2021, ho Bandeira Repúblika Demokrátika Timor-Leste (RDTL), ne’ebé pinta boot iha ró nia lolon no dada iha ró nia riin-klaran, maibé ró ne’e rasik rejistu iha International Maritime Organization (IMO) la’ós ho Bandeira RDTL.

Ró Berlin-Ramelau ko-finansiamentu hamutuk entre Governu Alemaña no Timor-Leste hamutuk no parte Governu Repúblika Federál Alemaña fó osan hamutuk millaun Euro 7,8 enkuantu restante atu bele kompleta millaun Euro 14.4 Governu Timor-Leste mak kompleta.

Berlin-Ramelau konstrui iha Xina, hosi empreza Armadora hosi Olanda ho naran Damen Shipyards ho nia luan metru 16, kaladu metru 3,3, naruk metru 67,3, konvés ho aas metru 4,8 no sei atinje velosidade másima nós 10 to’o 12.

Jornalista: Carmelita Isaac