Hatutan.com, (21 Dezembru 2021), Díli—Comissão Anti Corrupção (CAC) iha loron 21 fulan ne’e, tuku 8:00 dader ezekuta mandadu de buska no apreensaun ba rezidénsia kompañia gráfika pátria unipesoal Lda, tanba deskonfia Diretór, Edwin Wijaya halo falsifikasaun dokumentus kompañia nian hodi partisipa konkursu públiku ba projetu rua hosi Ministériu Transporte no Kumunikasaun (MTK), ba fornesimentu formuláriu livretes no formulaáiu karta kondusaun.

CAC Halo buska no apreensaun iha edifísiu gráfika pátria, Lecidere, Tersa (21/12/2021). Foto/Hatutan.com.

Buska no apreensaun hanesan mós halo ba suspeitu Edwin Wijaya nia hela fatin Taibesi, hodi halo mós aprensaun ba dokumentu kompañia nian balun.

“Ami ezekuta mandadu hosi Tribunál nian hodi halo buska no apreensaun iha fatin ida-ne’e, relasiona ho kazu balun ne’ebé kompañia ne’e involve iha tinan ida ne’e iha Ministériu balun, relasiona ho kazu falsifikasaun no frauda fiscal, no ami sei lori suspeitu ba iha CAC hodi halo prosesu verifikasaun tuir mandadu, Bainhira evidénsia forte maka CAC sei halo detensaun,” Pontu fokál CAC, Euclides Madeira hateten ba jornalista sira, hafoin halo buska no aprensaun iha edifisiu gráfika pátria, Lecidere, Tersa (21/12/2021).

Alende ne’e, iha suspeitu na’in ida tán Timoroan ne’ebé sei halo mós buska no areensaun mós ba ninia hela fatin.

Iha aprensaun ne’e, CAC konsege halibur no foti evidénsia item 32 ne’ebé sei suporta prosesu investigasaun liga ho dokumentu komprovativu hosi kompañia nian hanesan lisensa kompañia, dívidas, formuláriu  atividade komersiál, dokumentu tenderizasaun, konta bankária, karta kondusaun ne’ebé kompañia prodús inklui STNK, ho tán telemovel suspeitu nian no dokumentu sira seluk.

CAC Halo buska no apreensaun iha edifísiu gráfika pátria, Lecidere, Tersa (21/12/2021). Foto/Hatutan.com.

Busca no aprensaun ne’ebé hetan apoiu hosi PNSIK ne’e bazeia ba nuc. 0012/21.CACTL hosi Tribunál Distritál Dili liu hosi juiza Albertina Neves.

Suspeitu Edwin Wijaya deskonfia komete krime falsifikasaun dokumentu no frauda fiscal.

Tuir observasaun, daudaun ne’e PNSIK dada ona police line iha área kompañia gráfika pátria hodi la autoriza kualkér ema tama ba edifísiu laran.

Gráfika Pátria ho ninia atividade prinsipál maka printing bainhira hetan tenderizasaun hosi Governu no NGO hanesan halo banner tuir nesesidade ne’ebé instituisaun presija.

Jornalista: Carmelita Isaac