Hatutan.com, (13 Janeiru 2022) Díli– Tribunál Distritál Díli (TDD), adia julgamentu ba kazu krime partisipasaun ekonomika iha negosiu no administrasaun danoza ne’ebe deskonfia involve eis Ministru Komérsiu no Indústria (MCIA  atuál  membru Parlamentu Nasionál husi Bankada Partidu Demokrátiku, arguidu António da Conceicão “Kalohan”.

Notísia iha Relasaun: Kazu António “Kalohan”, Arguidu  PMCSV  Deklara Hatama Ekipamentu Kompletu iha 2015

António da Conceicão “Kalohan”. Foto/Espesiál

Tuir ajenda julgamentu TDD nian, Kinta (13/01/2022), kontinuasaun julgamentu kazu  ba ne’ebé envolve mos arguidu seluk, hanesan arguidu Antonio da Costa, arguida Zulmira Inácia Belo, arguidu Gaspar Policarpo da Silva Correia, Paul Manuel da Costa Soares Viana, maibé  Ministériu Públiku (MP) ne’ebé reprezenta husi Prokuradór Rogério Viegas la marka prezensa ho razaun sei tuir retiru MP iha  nian Lospalos hahú loron 13 to’o  loron 15 fulan-ne’e.

Kazu ne’ebé deskonfia envolve husi arguidu sira-ne’e relasiona ho fornesimentu ekipamentu laboratóriu indústria husi orsamentu kapitál menór ho montante global $200.000,00 iha tinan 2014 ne’ebé fó prezuiju ba  Estadu $143,500.00.

Tuir akuzasaun husi MP katak iha tinan 2014 arguidu sira uza osan kapital menór MCIA nian  atu sosa ekipamentu diversu ho montante global  $200.000.00, ate fulan-Jullu tinan 2014 orsamentu ne’e sidauk ezekuta tanba ne’e arguido António da Costa dezenvolve proposta sosa ekipamentu test kids ba laboratóriu, ekipamentu teste ba ethanol, no mákina apontamentu ba kafé, inklui mákina sona kafé, ne’ebé sai fasilidade iha sentru treinamentu Matadoru hodi fó treinamentu ba empreza indústria ki’ik no mós treinamentu ba staff tékniku hodi implementa programa indústria no mákina kafé atu fornse ba grupu produsaun kafé iha Aileu.

Iha loron 24 fulan-Juñu 2014, Ester Sam Gomes commit osan ho montante $200,000.00 iha CPV númeru 70840 ne’ebé autoriza husi Manuela G. B. Corte Real no sertifika husi Sulistiani Alves ho autorizasaun ba pagamentu ho montante $191,000.00, iha loron 24/07/2014 Ester Sam Gomes prepara kumpre ho montante $200,000.00.

Iha loron 04/08/2014 husi Dirasaun Nasional Aprovizionamentu Lojístika no Materiais, hahú anúnsiu konkursu aprovizionamentu hodi submete tenderizasaun ba fornesimentu ekipamentu, tanba ne’e iha kompañia 16 maka sosa dokumentu no iha kompañia 11 partisipa iha enkontru fornesimentu dokumentu refere, maibé tamba husi MCIA sidauk entrega dokumentu espesifikasaun ba ekipamentu ne’ebé atu fornese maka iha loron 11/08/2014 Diresaun Aprovizionamentu ho reprezentante kompañia 11 halo fali akta konkordánsia atu prolonga tan tempu ba submisaun dokumentu fornesimentu ekipamentu laboratories to’o loron 18/08/2014 nune’e total kompañia hamutuk 15 maka konsege partisipa iha tenderizasaun refere, maibé tuir rezultadu membru avaliasaun tékniku MCIA ne’ebé kompostu husi arguida Zulmira Inacia Belo, arguidu António da Costa, Filomena Fernandes, Isolina da Costa, arguidu Gaspar Policarpo da Silva Correia no hetan aprovasaun husi Ministru MCIA António da Conceicão hodi fó sai rezultadu katak kompañia Kaninuk hetan maka sai manan nain ho valor 98.6 ba projetu fornesimentu ekipamentu laboratóriu indústria.

Iha Ioron 26 fulan-Setembru /2014, MCIA liu husi Dirasaun Nasional Aprovizionamentu Lojístika no Materiais (DNALM), arguidu Gaspar Policarpo da Silva Correia selebra kontratu ho númeru RDTL-11419 ho arguidu Paul Manuel da Costa Soares Viana nu’udar diretór kompañia Kaninuk Star Unip, Lda, ho valor $191,000.00 no hetan aprovasaun husi arguidu António da Conceicão.

Ho arguidu nain lima nia hahalok, hamosu prejuizu ba Estadu ho montante osan $143,500.00, tanba ne’e MP akuza Arguida/u ba pratika krime partisipasaun ekonómika iha negósiu no administrasaun danosa, burla agravadu, falsifikasaun dokumentu ne’ebé previstu iha artigu 299, 274, 266, 267 husi kódigu Penal TL.

Audensia julgamentu prezide husi juiz kolektiva Maria solana, Ana Paula Fonseca, Ivan, Ministériu Públiku reprezenta husi prokurador Rogerio Viegas no arguidu sira hetan asistensia legal husi Defensor Públiku no Advogadu Privadu Pedro Camoes, Januario Martins,Cancio Freitas no Manuel Sarmento.

Jornalista: Carmelita Isaac