Hatutan (20 Janeiru 2022) Díli—Tribunál Distritál Díli (TDD), iha Kinta loron 20 fulan ne’e, liu hosi juiz kolektivu, Ana Paula Fonseca, Maria Solana no Ivan Suritay, hala’o primeiru julgamentu ba krime pekulatu ne’ebé deskonfia involve Funsionáriu Públiku Parlamentu Nasionál (PN), arguida JdJSB, tanba fa’an ona komputadór PN, ba nia kolega sasin IAX.

Sala Julgamentu TDD. Foto/Hatutan.com.

Iha audiénsia julgamentu arguida nega faktus ne’ebé iha katak, nia parte la fa’an komputadór ba IAX no nia laiha komunikasaun tanba IAX ho karáter ne’ebé susar atu konversa hamutuk, tanba ne’e arguida laiha koñesimentu kona-bá akuzasaun hosi Ministériu Públiku (MP).

Sasin IAX deklara iha audiénsia katak, nia parte koñese arguida la’ós hanesan família, maibé hanesan kolega serbisu.

“Iha momentu ne’eba arguida mak husu uluk ha’u atu sosa nia komputadór ho folin $400. Maibé, ha’u dehan $350 no nia aseita. Entaun, ha’u fó uluk osan depois iha lorokraik maka nia tula ba ha’u nia uma iha Becora, maibé ha’u la uza tanba a’at ona,” sasin deklara.

Advertisement

Sasin LS ne’ebé iha tempu ne’ebá hanesan Xefe Lojístika PN deklara bainhira konfirma ho sistema baze de dadus deteta katak, komputadór ne’e PN nian.

Hafoin rona arguida no sasin sira, Tribunál adi’a hikas julgamentu ba loron seluk hodi submete ba alegasaun.

Antes ne’e, tuir akuzasaun hosi MP katak arguida hahú serbisu FP iha PN ho level 5 nu’udár  tékniku IT, maibé iha tinan 2006/2007 PN sosa komputadór HP Paviliion G3033L (inklui asesoria) hamutuk 12, ho presu kada unidade $1.150, Network printer, HP Laser Jet 3005n unidade 1 ho presu kada unidade $1,540, HP Laser Jet 1022 unidade 12 ho presu kada unidade $395, HP Color Laser Jet 2605DN unidade 2 ho presu kada unidade $720, UPS Prolink PRO 600 unidade 16 ho presu kada unidade $155, softwere Microsoft Window XP Prof. SP2, unidade 16 ho presu kada unidade $175 no microsoft Office 2007 basic, unidade 16 ho presu kada unidade $225.

Iha tinan 2012, arguida fó hatene ba IAX katak “se hakarak sosa ha’u nia komputadór unidade 1 ho folin $400, komputadór ne’e ha’u nia maun lori hosi Indonézia, foin uza tinan 1 no sei di’ak, mana bele fiar, tanba ha’u servisu iha IT, tanba ne’e IAX mós fiar hodi sosa ho folin $300, maibé bainhira atu uza la di’ak tanba komputadór la funsiona”.

lha loron 01 fulan Agostu tinan 2016, IAX rona informasaun hosi Jorge Paiva, katak nia mós sosa komputadór ida hosi arguida maibé komputadór refere afinál Patrimóniu Parlamentu Nasionál.

Advertisement

Tanba ne’e IAX informa kedan ba LS, nu’udár Xefe Lojístika PN katak, nia parte sosa komputadór ida hosi arguida no daudaun iha hela uma, no LS haruka IAX entrega komputadór ne’e hodi konfirma ho sistema baze de dadus no ikus mai deteta katak, komputadór ne’e patrimóniu PN.

Depois halo identifikasaun ho sistema baze de dadus iha Lojístika PN identifika katak, komputadór ne’ebé arguida fa’an ba IAX mak komputadór ne’ebé kompostu hosi Monitór ho númeru serial koi mós tiha, key board 1 ho marka HP ho númeru serial BC3880 FVBW9FVB, ho ninia presu $1.150 no CPU 1 ho numeru serial SGH7260GQV SGH7260GQV ho $1.155 nune’e  totál presu hamutuk $ 1.305.

Relativamente iha prosesu investigasaun iha loron 19 fulan Juñu tinan 2018, Gabinete Sekertériu Jerál PN voluntariumente entrega objetu ekipamentu komputadór unidade ida ba iha Komisaun Anti Korupsaun, nu’udár meius prova, tanba ne’e MP akuza arguida ba pratika krime pekulatu ne’ebé previstu iha artigu 295 hosi kódigu penál TL.

Audiénsia julgamentu ne’e prezide hosi juiz kolektivu, Ana Paula Fonseca, Maria Solana, Ivan Suritay, MP reprezenta hosi prokuradór Rogério Viegas no arguidu hetan asisténsia legál hosi Advogada Virna Carvalho.

Jornalista: Carmelita Isaac

Advertisement