Hatutan.com, (31 Janeiru 2022), Díli-Isabel da Costa Ferreira, espoza Prezidente Partidu Libertasaun Popular (PLP) atuál Primeiru-Ministru (PM), Taur Matan Ruak, Segunda loraik (31/01/2022), ofisiálmente deklara nia kandidatura independente ba Prezidente Repúblika 2022-2027.

Notísia iha Relasaun: Kandidatu PR Lú Olo ho Armanda Berta Rejistadu, Lamukan Presiza Kompleta Dokumentu

Isabel da Costa Ferreira foto ho nia ekipa susesu. Foto/Hatutan.com

Isabel da Costa Ferreira liuhusi konferénsia ba imprensa iha Casa sidadania, Colmera, Dili, hateten  oportunidade ida-ne’e nia anunsia publikamente nia kandidatura independente ba Prezidente Repúblika Demokrátika Timor-Leste ba períodu 2022 no 2027.

“Ha’u aprezenta kandidatura ida-ne’e nu’udar inan, nu’udar feen no nu’udar membru família boot timor-oan sira-nian, ho espíritu serbisu, dedikasaun no sakrifísiu, tuir valór sira ne’ebé aas liu hosi umanizmu kristaun no doutrina sosiál igreja nian, ne’ebé dudu ha’u atu foti pozisaun afavór ba dezenvolvimentu, kreximentu no progresu saudavel nasaun nian, ho nia eransa ne’ebé ita hotu hakarak husik hela ba ita-nia oan sira no ba jerasaun tuir mai,” Isabel da Costa Ferreira hateten.

Aprezentasaun kandidatura ida ne’e nu’udar Profisionál no Jurista, tanba fiar katak konstrusaun sosiedade ida ekonomikamente justu no sosialmente ekuitativa, depende ba serbisu, empeñu no esforsu hamutuk afavór ba moris-di’ak no ba monitorizasaun konstante ba administrasaun justisa nian.

“Ha’u mos aprezenta ha’u nia kandidatura nu’udar ativista Direitu Fundamentál sira, tanba ha’u fiar iha importánsia sidadania ida, ativa, esklaresida, interesada no partisipativa, individual ka organizadu, afavór ba kauza boot polítika no sosial, ne’ebé mak presiza atu luta, se ita hakarak harii Timor-Leste ida ne’ebé di’ak, modernu, solidáriu, voluntáriu, tolerante no pasífiku liu tan,” Isabel da Costa Ferreira hateten.

Nia akresenta iha podér prezidensiál ne’ebé la hakerek iha Konstituisaun RDTL no lei sira, maibé hahoris husi politika prátika, jurisprudénsia ne’ebé influensia papél majistériu no konsidera iha kualidade aktivismu nu’udar funsaun esensial atu bele motiva, enkoraja, insentiva no mobiliza nasaun Timor iha tornu polítiku sosial hodi inisia diálogu polítiku no sosial ba kestaun sira ne’ebé sensivel ba nasaun.

Tuir nia, Timor-Leste iha nia Rejime Polítiku Semi-Prezidensiál ne’ebé Prezidente Repúblika dezempeña majistratura ida aas iha sistema Direitu Demokrátiku, karaterizadu ho separasaun podér.

Prezidente Repúblika mós nu’udar órgaun soberanu ida ho natureza unipesoal no independente, nune’e labele hetan influensia husi korrente politika, satán influensia husi partidu polítiku ka parte balun husi pais, munisípiu ka rejiaun iha territóriu nasional.

“Prezidente Repúblika iha partidu polítiku nia leten, tane as interese komún hodi garante no asegura demokrasia no respeita ba Konstituisaun RDTL,” Isabel da Costa Ferreira tenik.

Nu’udar kandidatura ida independente, aberta no a-partidária iha nia orijen, ne’ebé konvida ba mobilizasaun esforsu no vontade sira, aseita no hamahon ema hotu-hotu ne’ebé partilla mehi ida kona-bá pais ida modernu no dezenvolvidu, ho sidadaun ne’ebé preparadu di’ak, kualifikadu no aproveita oportunidade tomak hosi edukasaun, formasaun no kreximentu, la haree ba sira-nia kondisaun sosiál, orijen etno-jeográfika, ka sira-nia konxiénsia polítika no relijioza.

Isabel da Costa Ferreira ne’ebé deklara aan nu’udar kandidatura independente ne’e mós promete sei vizita suku hotu iha territóriu nasionál la’ós de’it durante kampaña eleitoral, maibé iha mandatu nu’udar prezidente repúblika uainhira povu fó konfiansa.

Jornalista: Vito Salvador