Hatutan.com (17 Fevereiru 2022), Díli—Sekretariadu Tékniku Administratasaun Eleitorál (STAE), husu kada kandidatura ne’ebé iha lista definitivu atu marka prezensa iha STAE hodi ko’alia kona-bá lista fiskais, preparasaun ba imprimi buletin de votus no kandidatu tenki aprezenta mós símbulu ne’ebé sei tau iha kada buletin de votus.

Diretór Jerál STAE, Acilino Manuel Branco. Foto/Hatutan.com.

“TR sei fiksa lista definitivu no horisehik notifika ona STAE. Tanba ne’e, orsida lorokraik ami planeia hasoru-malu ho reprezentante kandidatura hodi ko’alia kona-bá pontus importante tolu,” Diretór Jerál STAE, Acilino Manuel Branco ba jornalista-sira, hafoin partisipa dada sorteiu ba kandidatu PR, iha TR Kinta (17/02/2022).

Notisia iha Relasaun:Rezultadu Sorteiu Kandidatu Prezidente Repúblika 2022 to’o 2027

Pontu tolu ne’e mak hanesan, husu atu kada kandidatu prepara lista fiskais hamutuk 5.428, hodi kobre teritóriu, preparasaun ba imprimi buletin de votus no ikus liu husu ba kandidatura atu aprezenta simbolu ou sigla hodi ajusta iha buletin de votus tanba buletin de votus komtempla elementu ha’at hanesan númeru sorteiu, naran kandidatu, sigla no retaglu.

Preparasaun ba imprimi buletin de votus, Acilino esplika buletin de votus hanesan materiál sensitivu maibé tenki imprimi ho kualidade tanba ne’e liu hosi Konsellu Ministru aprova hodi indika Institutu Públiku Gráfika Nasionál maka sei prodús buletin de votus, tantu ba primeira ou segunda volta.

Tanba ne’e, daudaun ne’e STAE halo ona koordenasaun tékniku ho empreza públiku ne’e hodi hahú prodús buletin de votus iha loron 24 Fevereiru to’o 09 Marsu tuir númeru eleitores ne’ebé iha ho nune’e buletin de votus sei imprimi to’o 900.000.

Totál orsamentu ba eleisaun Prezidensiál ne’ebé alokadu ba STAE millaun $9-resin, maibé sei aloka mós ba rekursu oi-oin hodi sosa maskar, luvas, hand sanitezer, thermometer iha kada sentru votasaun ne’ebé prepara ona.

Rezultadu sorteiu ba kandidatura na’in 16 mak hanesan:

1. Isabel da Costa Ferreira
2. Hermes da Rosa Correia Barros
3. Maria Ângela Freitas da Silva
4. Rogério Tiago Fátima Lobato
5. Anacleto Bento Pereira
6. Francisco Guterres Lu Olo
7. Maria Helena Lopes de Jesus Pires
8. Tito da Costa Cristóvão (Lere Anan Timur)
9. Armanda Berta dos Santos
10. Antero Benedito da Silva
11. Constâncio da Conceção Pinto
12. Virgílio da Silav Guterres
13. Martinho Germano da Silva Gusmão
14. José Ramos Horta
15. Felisberto Araújo Duarte
16. Mariano Assanami Sabino Lopes

Jornalista: Carmelita Isaac