Hatutan.com, (17 Fevereiru 2023), Díli— Sekretariadu Tékniku Administrasaun Eleitorál (STAE) publika ona kalendáriu  operasionál eleitorál ne’ebé sei monu iha 19 Abríl hosi kandidatu Partidu Polítiku 24 ne’ebé sei partisipa iha eleisaun Parlamentár 2023 iha 21 Maiu.

Kalendáriu ne’ebé prepara hosi STAE publika ona iha Jornál da Repúblika iha 16 Fevereiru, no iha kalendáriu ne’e mensiona katak, to’o 15 Marsu kandidatu Partidu Politiku sira mós tenke entrega ona kandidatu sira ba Tribunál Rekursu (TR).

Lee Mós: STAE Rejista Eleitór 878.786 no Sei Publika Kalendáriu Operasionál bá Siklu Eleitorál

Iha deskrisaun ne’e deside katak, ba formasaun koligasaun partidáriu sira halo komunikasaun ba  Comissão Nacional de Eleições (CNE) to’o deit 05 marsu.

CNE mós fó sai ona, oras-ne’e daudaun iha kandidatu Partidu Polítiku hamutuk 24 mak kumpre ona rekezitu atu bele kompete iha eleisaun 21 Maiu tinan ne’e.

Partidu polítiku hirak ne’ebé sei konkorre no hala’o kampaña eleitorál ba eleisaun Parlamentár iha 19 Abríl ne’e mak hanesan;

1. Partidu Milénium Democrático (PMD)
2. Partidu Liberta Povu Aileba (PLPA)
3. Partidu Democrática República de Timor (PDRT)
4. Partidu Associação Populár Monarquia Timorense (APMT)
5. Partidu Haburas Unidade Nacional Timor Oan (KHUNTO)
6. Partidu Socialista de Timor (PST)
7. Partidu ba Dezenvolvimentu Popul ár (PDP)
8. Partidu Congresso Nacional de Reconstrução de Timor Leste (CNRT
9. Partidu Republicano (PR)
10. Partidu União Democrática Timorense (UDT)
11. Partidu Democrata Cristão (PDC),
12. Partido Movimento Libertasaun Povo Maubere (MLPM)
13. Partidu da Libertação Populár (PLP)
14. Partidu Democrático (PD)
15. Partidu Unidade Nacional Democrática da Resistência Timorense (UNDERTIM)
16. Partidu do Unidade Dezenvolvimentu Demokratiku (PUDD)
17. Partidu Timorense Democrático (PTD)
18. Partidu Frente Mudança (FM)
19. Partidu Social Democrata (PSD)
20. Partidu Centro Acção Social Democrata Timorense (CASDTL)
21. Partidu do Desenvolvimento Nacional (PDN)
22. Partidu Frente Revolucionário de Timor Leste Independente (FRETILIN)
23. Partidu Os Verdes (PV)
24. Partidu Dezenvolvimentu Sosiál (PDS).

To’o 25 Marsu, TR sei halo verifikasaun ba kandidatu Partidu Polítiku sira, hodi haree didiak sira ninia dokumentu legál sira atu bele komprova sira nia autentisidade no elejibilidade kandidatura, merese ka lae atu kompete iha eleisaun ne’e.

TR sei fó tempu ba kandidatu Partidu Politiku sira durante oras 24 atu bele halo aprezentasaun rekursu kona-bá rezeisaun ka admisaun, antes desizaun finál bá publikasaun entre 27 to’o 29 Marsu.

STAE sei publika totál númeru fatin ba sentru votasaun no estasaun de votu iha 21 Abril tinan ne’e no kampaña sei realiza iha 19 abril to’o 18 Maiu ne’ebé sei iha loron rua hodi halo reflesaun antes ba vota.

Iha kalendáriu ne’e mós hateten katak, iha 21 Maiu loron eleisaun nian urna sira sei hahú loke ba sidadaun sira iha tuku 07:00 no sei taka iha tuku 15:00 maibé sei prolonga mós to’o iha tuku 20:00.

Parte CNE sei publika rezultadu finál hosi votasaun nian iha 30 Maiu hafoin hetan validasaun hosi Tribunál Rekursu iha 06 juñu.

STAE publika kalendáriu operasaun ba eleisaun parlamentár Repúblika Demokrátika Timor-Leste nian  bazeia ba artigu 18 hosi Lei Eleitorál ba Parlamentu Nasionál, Númeru 6/2006, 28 dezembru, iha versaun dahaat no ikus hosi alterasaun Lei Númeru 9/2017, 5 maiu, no konsidera dekretu Prezidensiál Númeru 9/2023, 13 fevereiru, ne’ebé define iha loron 21 maiu 2023 hanesan loron eleisaun ba Parlamentu Nasionál.

Jornalista: Vito Salvadór