Hatutan.com, (28 Fevereiru 2022), Dili—Partidu Frente Revolusionáriu Timor-Leste Independente (FRETILIN), fó apoiu ba kandidatura Francisco Guterres Lú Olo, hodi re-kandidata an ba Prezidente Repúblika (PR), periudu 2022 to’o 2027, tanba iha razaun tolu ‘importante’.

Serimónia lansamentu ba sede kampaña kandidatu Prezidente Repúblika, Francisco Guterres Lú Olo nian, iha Otél Luz Clarita, Akait, Suku Grisenford, Dili, Segunda (28/02/2022). Foto/Hatutan.com.

Sekretáriu Jerál partidu FRETILIN, Marí Bim Amude Alkatiri temi razaun tolu ne’e mak hanesan, primeiru Lú Olo ema FRETILIN ne’ebé nunka nega. Bainhira kria komisaun diretiva FRETILIN nian iha foho, no sekretáriu komisaun diretiva ikus liu mak Lú Olo duni, troka Nino Conis Santana.

Notisia iha Relasaun:Rezolusaun IV Konferénsia Nasionál OPMT, Haforsa Disiplina Institusionál FRETILIN

Lú Olo nia kargu ikus liu iha ai-laran, sai nu’udár estrutura másima ida ba FFRETILIN, nune’e mós, iha 1998, Lú Olo, sai hanesan prezidente ba konsellu koordenadór FRETILIN nian, no iha tempu ne’ebá Alkatiri hanesan vise.

Segundu tanba Timor presiza Prezidente ida atu ajuda rai ne’e hodi hateke ba oin, ajuda atu hametin independénsia.

Terseira razaun maka, TL presija Prezidente ida atu transforma Prezidénsia Repúblika sai hanesan instituisaun ida, la’ós hanesan luhan ida ba partidu ida nian. Bainhira manán, ba tuur iha Palásiu Prezidente lori nia ema tomak ba enxe iha instituisaun ne’e.

“Razaun sira ne’e hotu, no razaun barak tán, ita nia kandidatu Lú Olo, úniku kandidatu agora iha Timor-Leste, tenke manán duni,” Alkatiri hateten durante intervensaun iha serimónia lansamentu ba sede kampaña kandidatu Lú Olo nian, iha Otél Luz Clarita, Akait, Suku Grisenford, Dili, Segunda (28/02/2022).

Kandidatu Prezidente Repúblika Francisco Guterres Lú Olo. Foto/Hatutan.com.

Iha fatin hanesan, kandidatu  Prezidente Repúblika Francisco Guterres Lú Olo, deklara katak, bainhira eleitu dala ida tán ba Prezidente Repúblika (PR), periúdu 2022 to’o 2027, sei hakru’uk de’it ba lei inan iha Konstituisaun Repúblika Demokrátika Timor-Leste (K-RDTL).

“Bainhira ha’u eleitu, ha’u sei hakru’uk de’it ba Konstituisaun ho lei sira, la hakru’uk tán ba vontade partidu ida ninia ka, partidu B ka C ninian,” Lú Olo hateten.

Prezidente Repúblika nu’udár orgaun ida ne’ebé iha lejitimidade direta hosi povu, no iha relasaun instituisionál ho parlamentu nasionál no governu.

Ho nune’e, PR iha nia kompeténsia rasik, atu bele hola desizaun saida de’it ba Estadu ida, tuir konstituisaun ho lei sira ne’ebé fó ba nia.

Jornalista: Rogério Pereira Cárceres