Hatutan.com, (17 Marsu 2022), Díli— Governu liu hosi Reuniaun Konsellu Ministru (KM) iha Kuarta (16/03/2022) aprova Projetu Dekretu Lei kona-bá Rejime Jurídiku foun ba Aprovizionamentu, Kontratu Públiku no nia Infrasaun sira, ne’ebé aprezenta hosi Ministru Finansa (MF) Rui Gomes.

Reuniaun Konsellu Ministru. Foto/MPKM.

“Dekretu Lei ne’e hanesan instrumentu importante ida ne’ebé mak sei ajuda instituisaun Governamentál atu implementa di’ak liután sira-nia programa no projetu sira,” Hatutan.com sita deklarasaun Ministru Rui Gomes, iha komunikadu.

Notisia iha Relasaun:KM Aprova Projetu Rezolusaun Sensus Uma-Ka’in 2022

Rejime jurídiku foun ne’e sei redús kustu kompras governamentál, redús korrupsaun, hasa’e kustu-benefísiu (value for Money), hasa’e konformidade impostu no konfiansa ba iha Governu.

Advertisement

Dekretu Lei ne’e Ministériu Finansas aprezenta tambá konsidera despeza públika iha peso ne’ebé boot tebes ba iha Timor-Leste nia Produtu Internu Brutu liuliu iha despeza ne’ebé rezulta hosi prosedimentu aprovizionamentu.

Tanbá ne’e, simplifika aprovizionamentu no kontratu públiku sei fó impaktu pozitivu ba iha ekonomia nasionál.

Aleinde ne’e, Ministériu Finansas konsidera katak, importante tebes atu aprova rejime jurídiku foun ida ne’ebé mais klaru, simples, rigorozu no transparente hodi promove dezenvolvimentu ekonómiku no sosiál.

Dekretu Lei foun ne’e sei integra rejime jurídiku atuál tolu ne’ebé aprova iha 2005: i) rejime jurídiku aprovizionamentu; ii) rejime jurídiku kontratu públiku; no iii) infrasaun administrativa sira, bai ha úniku rejime jurídiku ida de’it.

Dekretu Lei ne’e mós simplifika prosedimentus aprovizionamentu hosi tipu prosedimentu hitu ba tolu de’it; Mellora sistematizasaun no deskrisaun detalla hosi kada faze aprovizionamentu; Promove transparénsia ho reforsu hosi portál aprovizionamentu; Reforsu prosesu planeamentu; no Reforsu atribuisaun sira ba Komisaun Nasionál Aprovizionamentu nian.

Advertisement

Ba oin, Governu sei haruka Dekretu Lei ne’e ba Prezidente Repúblika atu tetu. Bainhira Prezidente Repúblika promulga maka Dekretu Lei ne’e sei troka Dekretu Lei n.º 10/2005, 21 Novembru kona-bá Regime Jurídiku Aprovizionamentu no Kontratu Públiku atuál ne’ebé iha ona vijênsia durante tinan 17 nia laran no sei entra em vigór iha loron 1 fulan-Jullu 2022 hodi fó biban ba funsionáriu sira hosi departamentu governamentál atu tuir sesaun traballu ka treinamentu molok implementa.

Dekretu Lei Foun ne’e hanesan Diploma importante ida hosi Diploma neen (6) ne’ebé Governu sei prepara, delibera no aprova hodi apoiu implementasaun Lei Enkuadramentu Orsamentál ne’ebé mak Prezidente Repúblika promulga ona iha loron 9 fulan-fevereiru 2022.

Dekretu Lei Aprovizionamentu foun ne’e aliña ho Programa Oitavu Governu Konstitusionál liuliu iha Reforma Jestaun Finansas Públikas liuhosi diversifikasaun finanseira iha área reseita no despeza, mellora sistema aprovizionamentu, fortalese desentralizasaun finanseira no orsamentu ho baze ba programa.

Antes aprezenta ba Konsellu Ministru, Ministériu Finansas halo ona konsultasaun lubuk ida ho reprezentante sira hosi departamentu governamentál no rekolla ona Pareser hosi Liña Ministériu sira.

Ministériu Finansa mós realiza enkontru tékniku ho reprezentante sira hosi Banku Mundiál no Banku Dezenvolvimentu Aziátiku iha ámbitu ezersísiu ba avaliasaun sistema aprovizionamentu Timor-Leste.

Advertisement

Jornalista: Carmelita Isaac