Hatutan.com, (02 Abríl 2022), Díli— Tuir kalendáriu hosi Sekretáriadu Tékniku Administrasaun Eleitorál (STAE), ho Comissão Nacional de Eleições (CNE), fó sai katak, kampaña eleitóral sei realiza durante semana rua, hahú hosi loron 02 to’o 16 fulan-abril, iha ne’ebé ohin abertura kampaña kandidatu Francisco Guterres Lú Olo halo komísiu iha kampu futeból Gleno Ermera no kandidatu José Manuel Ramos Horta iha Lifau, Rejiaun Administrativa Espesiál Oecusse Ambeno (RAEOA).

Kandidatu Prezidente Repúblika periudu 2022-2027, José Manuel Ramos Horta no Francisco Guterres Lú Olo. Foto/repro.

Antes ne’e, iha ona Partidu Politiku sira ne’ebé ofisialmente deklara ona hodi apoia kandidatu Lú Olo iha eleisaun segunda volta mak hanesan, FRETILIN rasik, KHUNTO, PLP no sira seluk tan, inklui sei hetan apoiu iha palku kampaña hosi líder másimu partidu apoiante sira mak hanesan atuál Primeiru Ministru (PM) Taur Matan Ruak, Konsileiru Másimu José dos Santos Naimori Bucar no seluk tán.

Notisia iha Relasaun:Sorteiu Eleisaun Segunda Volta, Horta Númeru 1 no Lú Olo 2

Hosi parte kandidatu José Manuel Ramos Horta, antes ne’e Partidu CNRT mak fó apoiu másimu no hetan apoiu iha eleisaun segunda volta  mak hanesan Partidu Demokrátiku (PD),  Partidu Demokratiku Repúblika Timorense (PDRT) no sira seluk tán, inklui sei hetan apoiu iha palku kampaña hosi líder másimu sira mak hanesan Prezidente Mariano Assnami Sabino Lopes ho Anacleto Bento Ferrreira no sira seluk tán.

Ajenda tuir mai, kandidatu numéru sorteiu 1 José Manuel Ramos Horta iha 03 Abril sei hala’o Diálogu iha munisípiu Liquiça, 04 Abril Diálogu iha munisípiu Aileu, 05 Abríl diálogu iha munisípiu Manatuto, 06 Abril Komisiu iha munisípiu Lautém, 07 Abril Dialogu iha Suai no Manufahi, 08 Abril diálogu iha munisipiu Bobonaro, 09 Abril diálogu iha munisipiu Ermera, 10 Abril diálogu iha munisipiu Ainaro no Ataúro, 11 Abril diálogu iha munisipiu Baucau, 12 Abril diálogu iha munispiu Viqueque, 13 Abril Komisiu iha munisipiu Dili, 15 Abril debate iha RTTL,EP.

Kona-bá kandidatu ho númeru sorteiru 2 Francisco Guterres Lú Olo, iha 03 Abril komisiu iha munisipiu Covalima, 04 Abril dialogu iha munisipiu Manufahi, 05 Abril dialogu iha munisipiu Aileu, 06 Abril dialogu iha munisipiu Liquiça, 07 Abril dialogu iha munisipiu Baucau, 08 Abril dialogu iha munisipiu Viqueque, 09 Abril komisiu iha munisipiu Lautem, 10 Abril komisiu iha munisipiu Manatuto, 11 Abril dialogu iha munisipiu Ainaro, 12 Abril dialogu iha munsipiu Ataúro, 13 Abril dialogu iha Munisipiu Bobonaro, 14 Abril dialogu iha RAEOA,  15 Abril debate iha RTTL, EP no 16 Abril komisiu iha munisipiu Dili.

Eleisaun Segunda volta sei realiza iha 19 Abril 2022.

Totál votante sira ne’ebé partisipa iha eleisaun prezidensiál, primeira volta 19 fulan-Marsu 2022 ho totál eleitór inskritu 856.613, eleitór votante  664.106, votu validu 651.859 (98,16%), votu branku 3.743 (0,56%), votu nulu 8.386 (1,26%), votu rejeitadu 65 (0,01%).

Atribuisaun votu válidu ba kada kandidatu tuir verifikasaun no validasaun ikus husi Tribunál Rekursu (TR) mak hanesan Kandidatu José Manuel Ramos Horta ho númeru sorteiu 14, hetan votu barak liu hamutuk 303.477 ho (46,6%) no Kandidatu Francisco Guterres Lú Olo ho númeru sorteiru 6, hetan votu barakliu daruak ho totál 144.282 (22,1%).

Jornalista: Rogério Pereira Cárceres