Hatutan.com (06 Abríl 2022), Dili– Kandidatu Prezidente Repúblika 2022-2027 ho númeru sorteiu  ida (1), José Manuel Ramos-Horta, promete ba povu atu mellora  kondisaun merkadu iha territóriu  nasionál no kontinua tau matan ba Klínika Bairru-Pité ho hadi’a ospitál sira hotu  iha Timor-Leste.  

Notísia iha Relasaun: Ramos-Horta Kontínua Luta ba Povu Nia Moris Di’ak

Kandidatu PR 2022-2027, José Manuel Ramos-Horta, fahe brosuza kampaña ba negosiante sira iha Merkadu Manleuana, Dili, Kuarta (06/04/2022). Foto/Hatutan.com

Liuhusi kampaña ho tipu oda-matan ba oda-matan (dor to dor) ne’ebé halo iha merkadu Manleuana, Dili, Kuarta (06/04/2022), Laureadu Nobel ba Pás nian ne’e  promete koalia ho Governu para tau osan mellora kondisaun infraestrutura ho saneamentu

Ramos-Horta haree katak merkadu Manleuana ho nia kapasidade boot no negosiante sira kontinua fan sira nia sasán no vendedór lubuk ne’ebé kada loron ba-mai sosa nesesidade sira, tanba ne’e presiza saneamentu ida kualidade kontrolu husi Ministériu Saúde, atu nune’e, evita moras no ema sira ne’ebé tama iha ne’e no ho  ijiene di’ak no moris saudavel.

Advertisement

“Ita sei ko’alia ho Governu tenke haree kondisaun merkadu, Ministériu Saúde tenke tau kondisaun no halo kontrolu di’ak, sei koloka pesoál seguransa  no garante utilizasaun eletrisidade hodi asegura sirkuitu sira ne’ebé bele lori risku ba negosiante sira nia vida,” José Ramos-Horta hateten.

Horta promete uainhira eleitu ba Prezidente Repúblika sei ko’alia ho Governu atu haree kondisaun real merkadu sira, tau postu seguransa, hadi’a kondisaun infraestrutura, liuliu uma ne’ebé sei fó mahon ba vendedór sira hodi satan sira husi loron nia manas no udan.

“Ha’u promete  sei hamutuk ho Governu ho parlamentu oinsá fó solusaun ba merkadu hotu iha territóriu nasionál, ha’u mós sei buka Governu husi rai-li’ur atu servisu hamutuk hodi hadi’a ita nia kondisaun merkadu iha Timor Leste,’’ Horta promete.

 Sei Tau Matan ba Klínika Bairru-Pité

José Manuel Ramos-Horta mós preokupa ho kondisaun ospitál sira iha Timor-Leste liga ho espasu ne’ebé limitadu halo pasiente balun obrigadu tenke aguenta iha kuradór ospitál sira hodi simu tratamentu husi pesoál saúde sira.

Advertisement

Nia mós preokupa ho kondisaun klínika Bairru-Pité ne’ebé oras ne’e enfrenta hela krize finanseiru no iha amiasadu no laran atu taka tamba la hetan apoiu másimu husi Governu.

“Klínika Bairru-Pité, Saudozu  Dr. Daniel Murphy mak harii no sai hanesan klínika komu idade nian no ema sira ne’ebé servisu iha ne’ebá ho dedikasaun maibé kondisaun la di’ak, ida ne’e mak presiza ita-nia atensaun,” Ramos Horta hateten.

Horta aprezenta uluk uainhira asume kargu nudár Xefe Estadu sempre tau matan ba klínika Bairru-Pité liu husi orsamentu prezidénsia repúblika no dalaruma hasai vensimentu rasik hodi apoiu pasiente sira tuberkuloze, laliu oferese ai-han nutritivu ba pasiente sira.

“Uluk kada tinan ha’u apoiu $15,000.00 ba klínika Bairru-Pité ho orsamentu prezidénsia repúblika nian no kadavés ha’u hasai ha’u nia vensimentu rasik, agora ha’u lahatene tamba sá mak paradu total. Uainhira ha’u sai fali prezidente repúblika sei haree hikas ida-ne’e,” nia promete.

Advertisement

Jornalista: Vito Salvador