Hatutan.com, (09 Abril 2022), Baucau-Kandidatu Prezidente Repúblika (PR), José Ramos Horta, liu husi kampaña ho tipu door to door iha suku Gariuai, Postu Administrativu Baucau Vila, Munisípiu Baucau,  promete uainhira eleitu ba PR sei servisu maka’as ho órgaun ezekutivu atu tau subsídiu iha setór agrikultura hodi hasae produsaun iha rai laran.

Notísia iha Relasaun: Kampaña Door to Door iha Seiçal-Laga, Horta Promete Servisu ho Governu Hadi’a Ekonomia

Kandidatu Prezidente Repúblika 2022-2027, José Manuel Ramos-Horta. Foto/Hatutan.com

Kandidatu Prezidente Repúblika 2022-2027, José Manuel Ramos-Horta hateten,  Prezidente Repúblika  nia knaar la’ós atu halo buat hotu ne’ebé ezekutivu (Governu) nian, maibé iha responsabilidade atu ko’alia ho Governu  dezenvolve di’ak liután agrikultura liu husi subvensaun públiku no fasilita kréditu ho funan-ki’ik atu motiva agrikultór sira hasae produsaun no kontribui ba kreximentu ekonomia família hodi redús dependénsia Timor-Leste ba importasaun hahán husi nasaun liur.

Ramos-Horta sei husu atu Governu liu husi Ministériu Agrikultura halo investimentu maka’as ba identifikasaun fini husi variedade ai-horis ne’ebé komunidade agrikultór sira sei kuda no tau mós prioridade ba irrigasaun, motiva komunidade hakiak animál hodi hadi’a rendimentu família.  

“Agrikultór sei la simu osan direita husi Governu, maibé sei liu husi sistema bankária, Governu tau osan iha BNCTL hodi fasilita agrikultór sira ho jurus ka funan ki’ik,” José Ramos-Horta hateten.

Atu garante sustentabilidade vida agrikultór sira nian hodi hasae kreximentu ekonomia família no nasaun,  tuir Ramos-Horta, Governu tenke mós iha politika investimentu ho “período de graça” ba agrikultór sira, signifika liu tiha tinan rua ka tolu mak hahú selu atu agrikultór sira iha biban tanba iha vida agrikultura agrikultór sira tenke kee-rai, kuda fini no kolleta, ho prosesu naruk ne’e sira presiza tempu no Governu tenke tau iha konsiderasaun.

“Governu tenke hanoin halo didi’ak atu kapitaliza BNCTL  ka loke banku ida própriu ba iha agrikultura indústria, floresta, peska hodi konsentra apoiu ba agrikultór sira,” Ramos-Horta subliña.

Horta mos promete atu ko’alia ho banku komersial no estatál sira atu haree oinsá tulun setór privadu nasional hodi bele hakbiit no fortifika atividade komersial sira ne’ebé fó empregu ba Timor oan sira.

Iha fatin hanesan, emprezáriu timoroan nudár mos Fatumaca-oan,  Eduardo “Gatot” hateten, PR nia knaar la’ós atu halo estrada no fahe osan, maibé iha obrigasaun atu ko’alia ho Governu hadi’a povu nia moris, tuir lei inan haruka hodi garante estabilidade no unidade nasional.

Prezidente Repúblika, Eduardo “Gatot” hateten, iha obrigasaun moral atu fó hanoin Governu ezekuta orsamentu estadu ho kuidadu no benefisia povu agrikultór nia moris liu husi subsídiu sira ne’ebé merese  no la’ós halo promesa falsu hodi haterus povu.

Eduardo “Gatot” husu atu populasaun Gariuai labele vota sala, maibé fó votu konfiansa  ba kandidatu José Ramos-Horta hodi hadi’a povu nia moris no lori dezenvolvimentu ba povu.

Jornalista: Vito Salvador