Hatutan.com, (08 Abríl 2022), Baucau- Kandidatu Prezidente Repúblika (PR) 2022-2027 ho númeru sorteiu ida (1), José Manuel Ramos-Horta, Sesta (08/04/2022), halo kampaña ho tipu door to door iha Suku Tekinomata, Postu Administrativu Laga no iha Suku Seiçal, Postu Administrativu Baucau Vila, Munisípiu Baucau.

Notísia iha Relasaun: Rogério Lobato ho PD husu Manatuto-oan Hotu Votu Ba Ramos-Horta Tanba Matenek no Koñesidu iha Mundu

Kandidatu PR 2022-2027, José Manuel Ramos-Horta ho ekipa halo kampaña door to door iha Suku Tekinomata-Laga ho Suku Seiçal, Baucau, 08 Abríl 2022. Foto/Hatutan.com

Iha kampaña door to door ne’e, Ramos-Horta ne’ebé akompaña husi dirijente sira partidu CNRT no kuadru Partidu Libertasaun Popular (PLP), Custodio Belo “Alin Laek” promete ba populasaun suku-rua ne’e atu servisu maka’as ho Governu hodi hadi’a ekonomia nasaun no povu nian ne’ebé manu hakdasak iha tinan haat atu ba tinan lima ikus ne’e.

Ramos-Horta haree katak iha tinan haat nia laran ne’e, ekonomia povu no nasaun nian enfrenta todan boot ida ka monu tanba impase polítika no violasaun konstituisaun ne’ebé komete husu ukun na’in sira, liuliu Prezidente Repúblika, Francisco Guterres “Lú Olo” ho VIII Governu Viabiliza husi partidu FRETILIN.

“Ba populasaun Laga ho Seiça sira, ha’u sei mai fali ho maun-boot Xanana no embaixadór sira atu haree oinsá mak bele mak haree poténsia investimentu iha Seiçal ho Laga atu bele loke kampu servisu no hadi’a povu nia ekonomia ne’ebé susar tebes-tebes ohin loron,” Ramos-Horta hateten.

Nia afirma tan, tinan lima mai ne’e dezafiu boot tebes maka povu ho nasaun nia ekonomia. Mezmu ema balun iha ukun dehan, ekonomia di’ak hela tanba sira la sente saida mak povu sente agora. Sira la sente ne’e tanba kada fulan sira simu hela osan no subvensaun sira seluk husi Estadu no husi povu nia osan.

Ramos-Horta hateten, iha eleisaun prezidensiál, 19 Abríl ne’e, povu tenke matenek atu hili Prezidente Repúblika ida ne’ebé bele hadi’a hikas imajen Timor-Leste iha mundu internasionál hodi hadi’a relasaun internasionál no konvense hikas investór internasionál atu mai halo investimentu hodi kria empregu ba foin-sa’e sira.

Nia mós duvida ho ema balun ne’ebé agora tuun ba halo kampaña atu hanesan fali kampaña ba eleisaun parlamentar, hodi soe propaganda polítika no kompromisu polítika atu fó subsídiu ba kada uma-ka’in $200.00.

“Sé hakarak fó bainhira povu ne’e moris iha susar nia laran, kalamidade 04 Abríl 2021 no aumenta tan ho sasán nia folin agora sa’e maka’as, Governu bele fó de’it ona. La’ós promete osan hodi buka votu husi povu. Ironia liu promesa ne’e mai husi Primeiru-Ministru ida,” Ramos-Horta hateten.

Premiadu Nobel ba  Pás ne’e salienta, uluk iha eleisaun prezidensiál 2007 nia kandidatura manan maioria iha Postu Laga tamba maioria populasaun fó votu konfiansa tamba ne’e iha esperansa boot atu manan iha eleisaun segunda volta hodi lori mudansa no hadi’a hikas povu nia moris.

Jornalista: Vito Salvador