Hatutan.com, (12 Abril 2022), Díli—Órgaun Liga Futeból Timor-Leste (LFTL) nafatin fó oportunidade ba klube sira primeira no segunda divizaun atu halo rejistrasaun ba jogadór sira ne’ebé sei joga ba kada klube iha liga époka 2022.

Diretór relasaun públika LFTL, Diogo Neto Fraga.

Diretór relasaun públika LFTL, Diogo Neto Fraga hateten to’o agora klube sira seidauk mai rejista sira nia jogadór maski órgaun liga anunsia ona kalendáriu ba transferénsia jogadór tuir oráriu hosi federasaun futeból mundiál.

Relasiona ho problema rejistrasaun klube sira nian, Parte LFTL fó tán tempu fulan ida atu klube sira bele halo rejistrasaun atu jogu LFTL epoka ne’e bele realiza tuir oráriu no planu ne’ebé órgaun liga prepara.

Bainhira klube sira iha difikuldade ruma ne’ebé impede sira atu halo rejistrasaun ba jogadór sira, órgaun liga sei fó tempu másimu fulan ida tán ba iha prosesu rejistu nian.

“Orgaun liga haree katak klube sira maioria iha preokupasaun liga ho subsidiu hosi governu no FFTL. Tanba ne’e LFTL servisu hamutuk ho FFTL atu buka meius hodi halais prosesu sira liga ho apoiu ba klube sira,” Diogo Neto Fraga hateten ba jornalista sira liu hosi konferénsia Imprensa ne’ebé hala’o iha edifísiu LFTL Bairru Grilhos, Tersa (12/04).

Klube futeból iha Timor Leste maioria nia fontes finanseiru mai hosi subsidiu ne’ebé governu aloka liu hosi FFTL no investimentu rasik sósiu klube nian.

Tanba problema finanseiru no problema seluk ne’ebé klube maioria enfrenta obriga klube sira labele halo rejistrasaun ba jogadór tanba tauk viola regra liuliu kontratu ho jogadór sira.

Em prinsipiu órgaun liga hanesan ezekutór ba atividade futeból, preparadu no iha ona kalendáriu tentativa ba oráriu jogu nian maibé too agora klube ida mós seidauk mai rejista no bainhira prosesu rejistu ne’e remata órgaun liga sei organiza dada sorteiu hodi hahú jogu.

“Liga prevee kalendáriu karik klube sira prienxe ona rekizitu ne’ebé hasai ona, entaun jogu sei hahu iha inisiu fulan Juñu ba primeira divizaun nian,” nia dehan.

Bainhira kompetisaun ba primeira divizaun époka 2022 la’o sei utiliza kampu rua, maibé kampu rua ne’e seidauk deside loloos.

Jornalista: Vito Salvadór