Hatutan.com, (26 Abríl 2022), Díli—Polísia Nasionál Timor-Leste (PNTL), liuhosi komandante Centro de Formação Policia (CFP), Superintendente Xefe Polísia, Arquimínio Ramos ho Prezidente Instituto Politécnica de Betano (IPB), Acaçio Cardoso Amaral, iha tersa 26 Abríl, asina nota entendimentu atu estabelese kooperasaun iha área formasaun no peskiza.

PNTL liuhosi komandante Centro de Formação Policia (CFP), Superintendente Xefe Polísia, Arquimíno Ramos ho Prezidente Instituto Politécnica de Betano (IPB), Acaçio Cardoso Amaral, iha tersa 26 Abríl, asina nota entendimentu atu estabelese kooperasaun iha área formasaun no peskiza. Foto/Hatutan.com.

“Ita halo kooperasaun ho IPB, rekursu balun ne’ebé PNTL presiza ita bele konvida korpu dosente sira atu bele apoia formasaun iha futuru. Ita mós iha kursu ne’ebé IPB interese atu partisipa,” Arquimino Ramos hateten liuhosi diskursu iha ámbitu selebrasaun akordu kooperasaun, iha Sala Auditóriu CFP, Akademia Comoro, Díli, Tersa (26/04/2022). 

Nota entendimentu ne’ebé parte rua asina hanesan mós ho akordu sira ne’ebé antes hala’o tiha ona ho Universidade Nasionál Timor-Lorosa’e (UNTL), Universidade da Paz (UNPAZ), iha ne’ebé kada tinan fó bolsu estudu ba membru PNTL na’in rua-rua, hodi kontinua hasa’e sira nia nível estudu iha lisensiatura no mestradu.

IPB foin mak kontaktu, realiza ona nota entendimentu ne’ebé, karik ba oin bele halo kooperasaun ida ne’ebé mak di’ak liu, entre instituisaun rua, iha área formasaun nomós iha área peskiza nian.

Prezidente IPB, Acacio Cardoso Amaral, sente kontente tanba ohin loron bele iha tán kooperasaun ida ho Sentru Formasaun Polisia. IPB foin ba dala-uluk, estabelese kooperasaun ho sentru de formasaun polísia.

Objetivu no lala’ok hosi akordu ne’e deskreve iha klauzula barak, iha artigu lubuk ida, iha dokumentu parseria ne’ebé parte rua asina ona.

Iha artigu 3 hosi klauzula sira ba dokumentu ne’e parte rua estabelese kooperasaun iha edukasaun no treinamentu liuhosi halo formasaun.

“Ho objetivu atu halu’an koñesimentu ba sira nian membru, iha ida-idak nia instituisaun. Iha artigu 6 funsaun hosi parte sira ne’ebé involve, IPB nomós CFP, iha artigu ne’e oinsá mak sentru formasaun polisia atu fornese formasaun pedagójika nível kuatru iha edukasaun, formasaun no avaliasaun ba dosente IPB,” Acacio Cardoso Amaral, haktuir.

Daudaun ne’e dosente universidade sira goza rejíme espesiál, karreira universitáriu no iha rejíme ida ne’e rasik ezíje atu dosente sira tenke iha formasaun própriu kona-bá pedagójika ninian.

Maske parte CFP Akademia PNTL fornese de’it sertifiakdu nível-4, maibé iha universidade ezíje tenke iha sertifikadu nível-5.

Funsaun IPB ninian hosi akordu kooperasaun ne’e maka, fornese formasaun ba iha membru PNTL sira iha área relevante, konforme akordu ne’ebé propoin hosi dirijente CFP. Área relevante sira ne’ebé IPB iha maka kursu kona-bá Konstrusaun sívil ho produsaun animál.

Kada tinan, bazeia ba matadalan engressu estudante foun IPB nian sempre iha rejíme espesiál ba membru PNTL nomós membru F-FDTL. Sira iha previléjiu atu rejista, karik hakarak kontinua eskola iha área ne’ebé sira gosta.

To’o agora seidauk iha membru PNTL no F-FDTL mak aproveita kanál ida ne’e iha IPB. Dala-ruma, liuhosi MoU ida ne’e, ba oin IPB sei bele simu. Maibé simu iha área ne’ebé IPB iha hanesan Konstrusaun Sivíl, nomós Produsaun Animál.

Jornalista: Rogério Pereira Cárceres