Hatutan.com, (05 Maiu 2022), Díli– Estadus Unidus Amerika (EUA) liu husi Ajénsia Estadus Unidus ba Dezenvolvimentu Internasionál (USAID, sigla Inglés) anunsia doasaun $500.000 bá Fundus Nasoins Unidas bá Labarik (UNICEF) hodi habelar asaun konjunta bá apoiu atu hatán bá COVID-19 nasionál iha Timor-Leste, inklui distribuisaun vasina sira.

Foto/USAID

Komunikadu imprensa ne’ebé Hatutan.com asesu iha Dili, Kinta (05/05/2022), relata katak Enkarregadu Negósiu Estadu Unidus Tom Daley anunsia hamutuk ona ho Reprezentante País UNICEF Timor-Leste, Bilal Durrani, horiseik.

$500.000 adisionál bazeia bá apoiu mak iha ona husi Estadus Unidus nia apoiu bá UNICEF hodi habelar intervensaun sira hatán bá COVID-19, ajuda bá implementasaun kampaña vasinasaun hasoru COVID-19 no kontinuasaun servisu esensiál sira saúde maternal, neonatal no infantíl.

Fundus ne’e sei mellora asesu bá fasilidade bee-moos, saneamentu, no ijiene (BESI sigla Tetun) iha Sentru Saúde Komunitária 14 sira (CHC sigla Inglés); advokasia no konxiensializasaun simu vasina no prevensaun COVID-19; no akizisaun suprimentu médiku esensiál sira hodi ajuda kontinuasaun servisu saúde krítiku sira. Maizumenus populasaun 500.000 mak sei benefisia husi intervensaun sira ne’e. 

“Hahú inísiu husi pandemia, Estadus Unidus servisu hamutuk ho Governu Timor-Leste hodi fornese vasina Pfizer doze 200.000 liu no asisténsia krítiku atu kombate COVID-19 millaun $6.4 liu,” Enkarregadu Daley hateten.

“Ami orgullu ba parseria ho Ministériu Saúde ho UNICEF hodi apoia Timor-Leste hatán bá COVID-19 no reforsa seguransa saúde atu prevene pandemia sira iha futuru. Timor-Leste bele kontinua konta ho Estadus Unidus bainhira ita servisu hamutuk hodi hakotu pandemia no halais rekuperasaun ekonomia.” 

To’o iha momentu ne’e ema rihun atus balun iha munisipiu lima benefisia ona husi atividade sira hatán bá COVID-19 liu husi parseria entre USAID, UNICEF, no Ministériu Saúde. Ne’e realiza ona liu husi melloria fasilidade BESI iha Sentru Saúde Komunitária 20 iha munisipiu lima; konsientizasaun kona-ba prevensaun COVID-19 no adosaun vasina liu husi enkontru advokasia sira, implementasaun koordenasaun mobilizasaun pesoál no mobilizasaun husi uma ba uma iha munisípiu haat; no provizaun instrumentu fase-liman no soprimentu ijiene sira iha sentru saúde 15. Nune’e mós, UNICEF inisia ona progresu melloramentu BESI iha Sentru Saúde adisionál 14 no inisia ona akizisaun konsentrador Oksijéniu médiku sira, ekipamentu protesaun pesoál, no soprimentu medikál sira seluk ba Sentru Saúde Komunitária sira.

“Ita agradese ba apoiu finansiamentu hodi hatan ba COVID-19 nasional, tanba sei ajuda liu labarik no familia sira hetan apoiu krítiku sira nesesita, inklui asesu ba fasilidade bee moos, saneamentu no ijiene iha sentru saude sira, hetan ona vasina hasoru CODID-19 no simu tratamentu bainhira sira moras,” Odete Maria Freitas Belo, Ministra Saúde haktuir.

“Apoiu konjunta husi USAID no UNICEF sei mós ajuda proteje profisionál saúde sira iha medida prestasaun servisu saúde sira-nian.”

UNICEF apoia hela ona Timor-Leste nia hatán bá COVID-19 nasionál hahú inísiu 2020, no kontribui ona ba melloria asesu ba servisu saúde sira, inklui servisu esensiál bá nutrisaun, imunizasaun rutina no kuidadu saúde ba inan no oan sira, melloria asesu bá aprendizajen distánsia no eskola seguru sira, ajuda instala sistema sira no habelar intervensaun protesaun labarik no protesaun sosiál sira.

“Parseria entre USAID, UNICEF, no Ministériu Saúde rezulta ona ba ema nia asesu bá bee moos iha sentru saúde barak, informasaun kona-ba prevensaun COVID-19 no vasina sira no iha tempu badak sentru saúde sira hetan soprimentu adisionál hanesan EPPs,” dehan Bilal Durrani, Reprezentante País UNICEF.

“Finansiamentu  ne’e sei ajuda habelar benefísiu intervensaun krítiku sira bá ema rihun-atus iha Timor-Leste tanba ita servisu hamutuk hodi prevene surtu COVID-19 no moras sira seluk, no ajuda formula rekuperasaun pos-COVID-19 sentrada bá labarik sira,” nia tenik.

Jornalista: Elio dos Santos da Costa