Hatutan.com, (12 Maiu 2022), Díli—Ministériu Solidariedade Sosiál no Inkluzaun (MSSI) realiza serimónia asina akordu ho parseiru Instituisaun Solidariedade Sosiál (ISS) hamtuk 29, iha salaun MSSI Kaikoli Díli, Kinta (12/05/2022).

Serimónia asina akordu entre MSSI ho Instituisaun Solidariedade Sosiál (ISS) hamtuk 29, iha salaun MSSI Kaikoli Díli, Kinta (12/05/2022).

Iha intervensaun, Vise-Primeira Ministra no Ministra Solidariedade Sosiál no Inkluzaun, Armanda Berta dos Santos, hateten, maske ho situasaun ne’ebé difísil maibé nia observa nafatin parseiru sira nia kontribuisaun ne’ebé favorável tebes.

“Ha’u mós louva no hato’o parabéns ba dirijentes instituisaun sira ne’ebé prezente daudaun, ne’ebé mak hatudu duni responsabilidade boot hodi nafatin prontu atende ita nia maluk sira ne’ebé presiza duni tulun,” Hatutan.com sita deklarasaun Armanda Berta dos Santos iha komunikadu.

Ho situasaun ne’e, iha ámbitu protesaun sosiál, MSSI durante periudu naruk ona mak apoiu mós entidade sira ne’ebé tulun hodi implementa programa Ministériu nian no mós hodi halo servisu ho karáter sosiál ba sosiedade timorense, liu-liu ba sira hirak ne’ebé mukit tebes.

Hanesan Ministra Solidariedade Sosiál no Inkluzaun, nia hakarak hato’o mós votus parabéns ba Instituisaun hirak ne’ebé liu ona prosesu instrusaun hodi hetan legalidade ba atribuisaun estatutu utilidade sosiál, no ida ne’e hatudu katak iha duni konsiderasaun ba instrumentu Estadu nian ne’ebé tenke tane duni ho responsabilidade.

“Aktus legá ne’ebé MSSI ho parseiru sira sei halo ne’e, atu garante katak, prosesu hirak ne’e hotu la’o tuir padraun enkuadramentu legál, no ISS nu’udár implementadór. Tanba ne’e mak ita presiza iha kooperasaun di’ak no garante akuntabilidade ho responsabilidade ne’ebé di’ak. Programa sira ne’e bazea ba planu asaun Ministériu nian iha âmbitu protesaun sosiál. MSSI durante periudu naruk ona mak apoiu mós entidade sira ne’ebé tulun implementa programa Ministériu nian hodi halo servisu ho karakter Sosiál ba ita nia sosiedade hotu,” nia hateten.

Ministériu Solidariedade Sosiál no Inkluzaun sei nafatin halo esforsu atu bele mellora mekanizmu hotu ne’ebé nakait ba apoiu no asisténsia ba parseiru sira iha tempu oin mai, nune’e bele fortalese ita nia instituisaun, no ikus mai bele hatudu rezultadu ho kualidade ne’ebé aas.

Jornalista: Elio dos Santos da Costa