Hatutan.com (06 Juñu 2022), Díli—Durante ezisténsia tinan 20, Ministériu Públiku (MP) kontinua enfrenta difikuldade iha parte rekursu umanu.

Maski ho situasaun ne’e, maibé Prokuradór Jerál Repúblika (PJR), Alfonso Lopez deklara katak, MP kontinua hala’o servisu ho imparsialidade ba fornesimentu justisa ne’ebé justu ba ema hotu-hotu.

Lee Mós: Ramos-Horta: MP Pilar Importante Bá Justisa no Demokrasia

“Ohin loron importante ba MP, tanba tinan 20 ezisténsia depois de restaurasaun independénsia hahú hosi inísiu todan tebes. Ekipamentu no rekursu umanu ne’ebé oitoan, maibé firmi no legalidade hodi kontinua la’o to’o ohin loron hodi asume papél ho legalidade ho intensaun imparsiál ho autonomia independente,” Alfonso Lopez hateten hafoin komemorasaun aniversáriu MP ba dala 20 iha salaun MNEK, Segunda (06/06/2022).

Progresu ne’ebé MP ultrapasa ona durante ninia ezisténsia maka, konsege alarga MP iha Munisipiu sira hanesan Ermera, Viqueque, Maliana.

Estabelesimentu  iha munisípiu ho objetivu atu lori justisa hakbesik ba povu no iha futuru sei harii MP iha Lospalos ne’ebé daudaun ne’e konstrusaun la’o hela.

Daudaun ne’e, totál majistradu de karreira iha MP hamutuk ema na’in 37 no na’in-sia mak sei iha faze formasaun.

Iha komemorasaun ne’e, MP halo aproximasaun ho Jaksa Agung Indonézia hodi servisu hamutuk iha área krime transnasionál hodi evita transaksaun illegál ne’ebé dalabarak akontese tantu liu hosi tasi no rai-maran.

Jornalista: Carmelita Isaac