Hatutan.com (07 Juñu 2022), Díli—Ministru Justisa (MJ) Tiago Amaral Sarmento akompaña hosi Diretór Jerál Administrasaun no Polítika Justisa, Salvadór da Costa Fernandes, hala’o vizita urjente ba Servisu Rejistu Notariadu Munisípiu Dili, hodi halo inspesaun ba servisu atendementu públiku iha fatin ne’e, Tersa (07/06/2022).

Ministru Justisa (MJ) Tiago Amaral Sarmento akompaña hosi Diretór Jerál Administrasaun no Polítika Justisa, Salvadór da Costa Fernandes, hala’o vizita urjente ba Servisu Rejistu Notariadu Munisípiu Dili, hodi halo inspesaun ba servisu atendementu públiku iha fatin ne’e, Tersa (07/06). Foto/Média MJ.

Inspesaun urjente ne’e hodi haree direta problema no dezafiu ne’ebé Servisu Rejistu Notariadu Munisipál Díli enfrenta, nune’e Ministru Justisa orienta kedan Diretora Servisu Munisipál Díli hodi  buka meius atu rezolve dezafiu ne’ebé sira enfrenta.

Lee Mós: Abitante Sira Forma Naruk no Hein Kleur Trata BI ho Sertidaun RDTL

Dezafiu ne’ebé iha maka, espasu ne’ebé kiik ka kloot no ekipamentus Informasaun Teknolojia (IT) nian ne’ebé limitadu, no liña internet ne’ebé ladún di’ak ka la estável, inklui menus rekursu umanu iha Diresaun munisípal Díli, liuliu téknika ba servisu prosesa emisaun dokumentu.

“Nune’e, Ministru Justisa orienta kedan ba Diretora Servisu Rejistu Notariadu Munisípiu Dili nian hodi kooerdena ho Diretór Jerál Rejistu Notariadu hodi bele muda kedan funsiunáriu na’in-haat no ekipamentu mai hodi haforsa Servisu Rejistu Notariadu Munisípiu Díli nian,” Hatutan.com sita komunikadu.

Lee Mós : Sidadaun Sira Kontinua Forma no Sena-Malu iha Resintu Notariadu Díli

Ministru Justisa orienta mós Diretór Jerál Politika Justisa nian, hodi haree fila fali MoU ne’ebé iha entre Ministériu Justisa ho Childund no UNICEF atu bele halo renovasaun ba kooperasaun, nune’e Servisu Rejistu bebé iha ospitál sira bele kontinua nafatin, bele fasilita bebé sira ne’ebé foin moris rejistra kedan iha Ospitál sira, nune’e garante labarik sira moris rejistadu iha  Sentru Saúde sira.

Ministru Justisa Orienta mós Diretór Jerál Politika Justisa atu koordena ho Diretór Jerál Rejistu Notariadu atu bele rekolha mákina ka impressora balun hosi fatin sira ne’ebé ema ladún iha hanesan Metinaro, nune’e bele haforsa Servisu iha Rejistu Notariadu Munsípiu Díli nian.

Antes ne’e, iha fulan Maiu Ministru Justisa halo ona reuniaun ho Diretór Jerál servisu Rejistu Notariadu no Diretores Nasionál sira iha Rejistu Noatriadu nian inklui Diretora Munisípiu Dili nian atu solusiona dezafiu ne’ebé diresaun refere enfrenta, tanba volume sidadaun ne’ebé trata dokumentus aumenta ass ka barak tebes.

Jornalista: Carmelita Isaac